Job 4:1-21
4 Nao Elifas+ we i man Teman i ansa se:
2 “?Sipos wan man i traem toktok long yu, bambae yu kros kwiktaem?
?From we hu i save blokem hem wan blong i no toktok?
3 I tru, bifo yu yu stretem plante man,Mo oltaem yu mekem ol han we i slak, oli kam strong bakegen.
4 Ol tok blong yu i stap leftemap olgeta we oli stambol,
Mo yu stap mekem ol ni we i ben oli kam strong bakegen.
5 Be naoia samting ya i kasem yu, mo i daonem gud yu.*I kasem yu, mo i mekem tingting blong yu i foldaon bigwan.
6 ?Fasin blong yu blong ona long God, i no mekem se yu trastem hem?
?Fasin blong yu blong mekem i stret,+ i no givim hop long yu?
7 Plis tingbaot: ?Yu yu luk finis wan man we i no gat fol i lus?
?Wetaem yu luk wan stret man we trabol i spolem gud hem?
8 Samting we mi luk hemia se olgeta we oli plao long* samting we i nogudMo olgeta we oli planem trabol, bambae oli kasem sem samting ya nomo.
9 Taem win blong God i kasem olgeta, oli lus,Mo taem kros blong hem i faerap, oli ded.
10 Laeon i singaot bigwan, mo wan yang laeon i mekem noes long trot blong hem,Be ol tut blong ol strong laeon* tu oli brobrok.
11 Wan laeon i ded from i no gat animol blong hem i kakae,Mo ol pikinini blong wan laeon oli go wanwan.
12 Nao wan tok i kamtru long mi we i no gat man i save,Mo mi harem, be i olsem wan wispa nomo long sora blong mi.
13 Long naet, taem ol man oli slip ded,Mi luk wan vison we i mekem tingting blong mi i trabol tumas,
14 Nao wan fraet i kilim nogud mi,I mekem evri bun blong mi oli seksek.
15 Wan spirit i kam pas long fes blong mi,Mo ol hea long bodi blong mi oli stanstanap.
16 Nao spirit ya i stanap we i no muv,Be mi no luksave se hem i wanem.
Wan samting i stap stret long fes blong mi.Ples i kwaet, nao mi harem wan voes i se:
17 ‘?Yu ting se man we i nating nomo, i stret moa i bitim God?
?Yu ting se wan man i klin moa i winim Man We i Mekem hem?’
18 !Yu luk! Hem i no trastem ol man blong wok blong hem,Mo hem i stap faenem poen long ol enjel* blong hem.
19 Sipos i olsem, bambae hem i mekem i mowas long olgeta we oli laef long ol haos we oli wokem long klei,We fandesen blong olgeta i stap long das,+Mo we oli save smas isi nomo olsem bebet.*
20 Trabol i stap spolem gud olgeta, stat long moning kasem sapa.Oli lus olwe, mo i no gat man i luksave.
21 ?Yu no ting se oli olsem tent we man i pulumaot ol rop blong hem?
Oli ded we oli no gat waes yet.
Ol futnot
^ PT: “i mekem we yu kam slak olgeta.”
^ NT: “we oli mekem plan blong.”
^ NT: “ol man laeon we oli yang mo oli gat plante hea long nek blong olgeta.”
^ NT: “ol mesenja.”
^ PT: “mot.” Hemia wan bebet we i luk olsem bataflae.
