Namba 24:1-25
24 Taem Balam i luk se Jehova i glad* blong blesem Isrel, hem i no aot bakegen blong go lukaot ol saen blong singaot trabol i go long olgeta,+ be hem i tanem hem, i lukluk i go long draeples.
2 Nao taem hem i lukluk i go, mo i luk ol man Isrel we oli kamp folem traeb blong olgeta,+ spirit blong God i kam long hem.+
3 Nao hem i talemaot proveb ya se:+
“Hemia ol tok blong Balam we i boe blong Beo,Mo ol tok blong man ya we ae blong hem i jes open,
4 Ol tok blong man ya we i harem tok blong God,Mo i luk vison blong God Ya We i Gat Olgeta Paoa,Nao hem i foldaon we ae blong hem i open nomo i stap:+
5 O Jekob, ol tent blong yu oli naes tumas,!Yes, ol haos we yu stap long hem oli naes tumas, O Isrel!+
6 Oli spred i go longwe olsem ol krik,*+Olsem ol garen we oli stap long saed blong reva,Olsem ol alos we Jehova i planem,Olsem ol sida we oli gru long saed blong reva.
7 Wota i gohed blong ronaot sloslo long tufala baket blong hem we oli wokem long skin blong animol,Mo ol sid* blong hem oli kamaot from plante wota.+
King blong hem+ tu bambae i hae moa long Agag+Mo kingdom blong hem bambae i strong.+
8 God i tekemaot hem long Ijip,Paoa blong hem i givhan long olgeta olsem ol hon blong wan wael bul,
Bambae hem i spolemgud ol nesen, hemia ol man we oli stap mekem i strong tumas long hem,+Mo bambae hem i kakae ol bun blong olgeta, mo i smasem olgeta long ol bonara blong hem.
9 Hem i bendaon nao i ledaon olsem wan laeon,Mo olsem wan laeon, ?hu bambae i naf blong go hambag long hem?
Olgeta we oli blesem yu, oli kasem blesing,Mo olgeta we oli singaot trabol i kam long yu, oli kasem trabol.”+
10 Nao Balak i kros tumas long Balam, mo i stap klapem han blong hem, nao i talem se: “Mi mi singaot yu yu kam ya blong yu singaot trabol i go long ol enemi blong mi,+ be yu girap yu blesem olgeta tri taem.
11 Naoia yu gobak long ples blong yu. Mi mi gat tingting blong mekem plante samting blong leftemap yu,+ !be yu luk! Jehova i tekemaot samting ya long yu.”
12 Nao Balam i ansa se: “Mi mi talem finis long ol mesenja blong yu se:
13 ‘Nating sipos Balak i givim haos blong hem we i fulap long silva mo gol, be bambae mi mi no naf blong folem prapa tingting blong mi* blong agensem oda we Jehova i givim, nating se i gud o i nogud. Bambae mi mi talemaot nomo ol tok we Jehova i talem long mi.’+
14 Naoia mi mi stap gobak long ol man ples blong mi. Be yu kam, bambae mi talemaot long yu ol samting we ol man ya bambae oli mekem long ol man blong yu long fiuja.”*
15 Nao hem i talemaot proveb ya se:+
“Hemia ol tok blong Balam we i boe blong Beo,Mo ol tok blong man ya we ae blong hem i jes open,+
16 Ol tok blong man ya we i harem tok blong God,Mo man ya we i save Hae God,Man ya we i luk vison blong God Ya We i Gat Olgeta Paoa,Taem hem i foldaon we ae blong hem i open nomo i stap:
17 Bambae mi luk hem, be i no naoia,Ae blong mi bambae i luk hem, be no yet.
Wan sta+ bambae i kamaot long Jekob,Mo wan septa*+ bambae i kamaot long Isrel.+
Mo bambae hem i brebrekem hed* blong Moab,+Mo i smasem bun blong hed blong olgeta boe we oli stap mekem faet.
18 Mo Edom bambae i kam ples blong hem,+Yes, ol enemi bambae oli holem Seiri+ i blong olgeta,+Long taem we Isrel i soemaot se i gat strong tingting.
19 Mo wan we i kamaot biaen long Jekob bambae i winim ol enemi,+Mo eni man we oli laef yet long taon, bambae hem i spolem.”
20 Taem Balam i luk Amalek, hem i gohed blong talemaot proveb blong hem, i se:
“Amalek i faswan long ol narafala nesen,+Be long en bambae hem i lus.”+
21 Mo taem hem i luk ol man Kenaet,+ hem i gohed blong talemaot proveb blong hem, i se:
“Ples blong yufala i wan sefples, mo haos blong yufala i stap antap long hil we i ston nomo.
22 Be wan man bambae i bonem Kenae long faea.
?Hamas taem i stap yet bifo we Asiria i kam holem yu mo i tekem yu yu go?”
23 Ale hem i gohed i talemaot proveb blong hem, i se:
“!Sore tumas! ?Hu bambae i laef taem God i mekem samting ya?
24 Ol sip bambae oli aot long Kitim+ oli kam,Bambae oli spolem Asiria,+Mo bambae oli spolem Eba.
Be biaen, hem tu bambae i lus.”
25 Nao biaen Balam+ i girap mo i gobak long ples blong hem. Mo Balak tu i gobak long rod blong hem.
Ol futnot
^ PT: “se i gud long ae blong Jehova.”
^ NT: “laen.”
^ PT: “hat blong mi.”
^ NT: “long en blong ol dei.”
^ NT: “fored.”
