Ol Sam 103:1-22
Singsing blong Deved.
103 I gud mi* presem Jehova.
I gud evri samting long mi oli presem tabu nem blong hem.
2 I gud mi* presem Jehova.
Mo i gud mi no fogetem olgeta samting we hem i bin mekem.+
3 Hem i fogivim olgeta rong blong yu+Mo i hilim evri sik blong yu.+
4 Hem i tekembak laef blong yu long hol*+Mo i mekem fasin blong hem blong lavem man oltaem mo sore, tufala i flasem yu olsem hat blong king.+
5 Hem i mekem yu yu harem gud long ol gudfala samting+ long ful laef blong yu,Mekem se yangtaem blong yu i kam niuwan bakegen olsem blong wan igel.+
6 Jehova i mekem samting long stret fasin+ mo long jastisLong bihaf blong ol man we narafala i stap spolem olgeta.+
7 Hem i soemaot ol rod blong hem long Moses,+Mo ol wok blong hem long ol man Isrel.+
8 Jehova i gat sore mo i kaen,+I no save kros kwik, mo fasin blong hem blong lavem man oltaem i bigwan tumas.+
9 Bambae hem i no save lukaotem ol mastik oltaem,+No i holem kros blong hem olwe.+
10 Hem i no panisim yumi stret long mak blong ol sin blong yumi,+Mo i no givimbak long yumi stret folem ol mastik blong yumi.+
11 Fasin blong hem blong lavem man oltaem, we hem i soemaot long olgeta we oli fraet* long hem, i bigwan tumas,+Olsem we heven i hae moa i bitim wol.
12 Hem i putum ol sin blong yumi oli stap longwe we longwe long yumi,+Olsem we is i stap longwe we longwe long wes.
13 Jehova i sore long olgeta we oli fraet* long hem,+Olsem wan papa we i sore long ol pikinini blong hem.
14 From hem i save gud olsem wanem hem i mekem yumi,+Hem i tingbaot we yumi das nomo.+
15 Be man, laef blong hem i sot olsem blong gras,+Hem i olsem wan flaoa we i open long open ples.+
16 Be taem win i blu, flaoa ya i no moa stap,I olsem se i no bin stap long ples ya bifo.*
17 Be fasin blong Jehova blong lavem man oltaem, i stap oltaem gogo i no save finisBambae hem i soemaot long olgeta we oli fraet* long hem,+Mo i soemaot stret fasin blong hem long ol smol bubu blong olgeta,+
18 Mo long olgeta we oli holem kontrak blong hem+Mo long olgeta we oli lukaot gud blong folem ol oda blong hem.
19 Jehova i stanemap tron* blong hem i stap strong long heven,+Mo hem i king, i rul long olgeta samting.+
20 Yufala i presem Jehova, yufala ol enjel blong hem,+ we yufala i gat bigfala paoa,Yufala i stap mekem ol samting we hem i talem,+ mo yufala i stap obei long voes blong hem.*
21 Yufala i presem Jehova, yufala ol ami blong hem,+Yes ol minista blong hem, we yufala i stap mekem samting we hem i wantem.+
22 Evri wok blong Jehova, yufala i presem hemLong olgeta ples we hem i stap rul long hem.
I gud ful bodi* blong mi i presem Jehova.
Ol futnot
^ NT: “sol blong mi i.”
^ NT: “sol blong mi i.”
^ NT: “gref.”
^ NT: “tinghevi.”
^ NT: “tinghevi.”
^ PT: “Ples we flaoa ya i gru long hem, i fogetem hem.”
^ NT: “tinghevi.”
^ NT: “jea blong king.”
^ PT: “harem voes (saon) blong tok blong hem.”
^ NT: “sol.”
