Ol Sam 55:1-23
Long daerekta. Blong sing wetem ol instramen we i gat string. Maskil.* Singsing blong Deved.
55 O God, yu lesin long prea blong mi,+Mo yu no mekem olsem se yu no harem mi, taem mi askem blong yu sore long mi.*+
2 Yu lukluk mi mo yu ansa long mi.+
Ol wari blong mi, oli mekem se mi no save stap kwaet,+Mo mi no save tingting gud
3 From ol samting we ol enemi oli stap talemMo ol hevi samting we ol man nogud oli stap mekem long mi.
From we oli hivimap ol trabol antap long mi,Mo from we oli kros long mi, oli holemtaet ol rabis tingting agensem mi.+
4 Insaed long mi, hat blong mi i soa tumas,+Mo fraet blong ded, i mekem mi mi fraet bitim mak.+
5 Mi mi fraet mo mi stap seksek,Mo bodi blong mi i seksek bitim mak.
6 Mi stap talem se: “!Sipos mi gat wing olsem sotleg nomo!Bambae mi save flae, mi go stap long wan sefples.
7 !Yu luk! Bambae mi save flae i go longwe.+
Bambae mi save mekem ples blong mi long draeples.+ (Selah)
8 Bambae mi save go kwiktaem long wan ples we i gat seltaWe i stap longwe long strong win mo hariken.”
9 O Jehova, yu mekem olgeta oli konfius, mo yu spolem ol plan blong olgeta,*+From mi luk we i gat raorao mo faet long taon ya.
10 Long dei mo long naet oli stap wokbaot raon long ol stonwol blong hem,Mo insaed long hem, i gat ol rabis tingting mo trabol.+
11 Evri ples long taon ya i kam nogud.
Ol man blong spolem man mo ol man blong giaman, oli stap oltaem long ol pablik ples long taon ya.+
12 From man ya we i stap tok nogud long mi, i no wan enemi,+Sipos hem i wan enemi, bambae mi lego nomo.
Man ya we i girap agensem mi, i no wan badfren,Sipos hem i wan badfren, bambae mi save haed long hem.
13 Be hemia yu ya, wan man olsem mi,*+Wan gudfala fren blong mi we mi save gud.+
14 Bifo yumitu fren gud tugeta.
Mo yumitu stap wokbaot oltaem wetem bigfala hip blong ol man, i go insaed long haos blong God.
15 !I gud wan trabol i kasem olgeta!+I gud oli godaon long Gref,* we oli laef nomo,From we rabis fasin i stap wetem olgeta mo i stap insaed long olgeta.
16 Be mi, bambae mi singaot i go long God,Mo Jehova bambae i sevem mi.+
17 Long sapa, long moning mo long aftenun, tingting blong mi i trabol mo mi stap krae smosmol,*+Mo hem i harem voes blong mi.+
18 Nating se ol man oli stap faet agensem mi, be bambae hem i tekemaot* mi mo i givim pis long mi,*From we plante man oli kam agensem mi.+
19 God bambae i harem mo i ansa long olgeta,+Yes, man ya we i stap sidaon i stap rul bifo finis i kam.+ (Selah)Bambae oli no wantem jenis,Hemia olgeta we oli no fraet* long God.+
20 Hem* i atakem olgeta we oli gat pis wetem hem.+
Hem i brekem kontrak blong hem.+
21 Ol tok blong hem oli smut moa i bitim bata,+Be rao i fulap long hat blong hem.
Ol tok blong hem oli sofsof moa i bitim oel,Be oli olsem naef blong faet we i save gotru long man.+
22 Yu sakem ol hevi baden blong yu long Jehova,+Mo hem bambae i sapotem yu.+
Bambae hem i neva letem wan stret man i foldaon.+
23 Be yu God, bambae yu mekem olgeta oli godaon long hol ya we i dip olgeta.+
Olgeta we oli gat fol from blad blong narafala, mo ol man blong giaman, bambae oli ded we oli strong nomo.+
Be mi, bambae mi trastem yu.
Ol futnot
^ NT: “Mo yu no haed taem mi prea long yu blong yu halpem mi.”
^ PT: “mo yu mekem lanwis blong olgeta i paspas.”
^ NT: “wan man, we i sem mak long mi.”
^ NT: “mo mi stap singaot bigwan.”
^ PT: “pembak.”
^ NT: “sol blong mi.”
^ NT: “tinghevi.”
^ Hemia fren blong hem we vas 13 mo 14 i tokbaot.
