Ol Sam 64:1-10
-
God i protektem man long ol rabis plan we oli haed
-
“God bambae i sutum olgeta” (7)
-
Long daerekta. Singsing blong Deved.
64 O God, yu harem voes blong mi, taem mi krae long yu.+
Yu lukaot gud long laef blong mi, blong ol samting blong fraet we ol enemi oli mekem, i no kasem mi.
2 Yu blokem gud mi blong ol plan we ol man nogud oli mekem haed nomo, i no spolem mi,+Yes, yu blokem mi long bigfala hip blong ol rabis man.
3 Oli sapenem tang blong olgeta olsem naef blong faet.
Oli stap makem ol man long ol rabis tok blong olgeta we i olsem ol ara,
4 Nao oli stap wet long ol ples blong haed blong olgeta, blong sutum man we i no mekem rong.
Nao wantaem nomo oli sutum hem, we oli no fraet nating.
5 Oli holem strong ol rabis plan blong olgeta.*Oli tokbaot olsem wanem blong haedem ol trap blong olgeta.
Oli se: “?Hu bambae i luk olgeta?”+
6 Oli stap lukaotem ol niufala rod blong mekem ol samting we oli nogud.
Oli haed, oli stap mekem ol plan blong olgeta we oli tingting gud long hem.+
Man i no save faenemaot ol tingting long hat blong olgeta.
7 Be God bambae i sutum olgeta,+Nao wantaem nomo bambae wan ara i givim kil long olgeta.
8 Tang blong olgeta nomo bambae i mekem se oli foldaon.+
Evri man we oli stap lukluk olgeta, bambae oli saksakem hed blong olgeta from.
9 Nao olgeta man bambae oli fraet,Mo bambae oli talemaot samting ya we God i mekem,Mo bambae oli save gud ol wok blong hem.+
10 Stret man bambae i glad from Jehova, mo i go long hem blong haed.+
Olgeta we hat blong olgeta i stret, bambae oli presem hem.*
Ol futnot
^ NT: “Oli stap lefleftemap tingting blong olgeta blong mekem ol rabis fasin.”
^ NT: “bambae oli tok flas.”
