Ol Wok blong ol Aposol 3:1-26
3 Nao long namba 9 aoa* hemia long taem blong prea, Pita mo Jon tufala i go long tempol.
2 Nao i gat wan man i stap long ples ya we i no save wokbaot, from we taem hem i bon, leg blong hem i nogud. Mo evri dei ol man oli stap go putum hem klosap long doa ya blong tempol we nem blong hem Naes Doa, blong hem i save askem ol presen blong sore long ol man we oli stap go insaed long tempol.
3 Taem hem i luk we Pita mo Jon tufala i stap kam blong go insaed long tempol, hem i askem long tufala blong tufala i givim ol presen blong sore long hem.
4 Be Pita mo Jon, tufala i lukluk stret long man ya, mo Pita i talem se: “Yu lukluk mitufala.”
5 Nao hem i lukluk tufala, i ting se bambae tufala i givim wan samting long hem.
6 Be Pita i talem long hem se: “Mi mi no gat silva mo gol, be wan samting nomo we mi mi gat, bambae mi givim long yu. Long nem blong Jisas Kraes ya we i Nasarin, mi mi talem long yu se: !Yu girap, yu wokbaot!”+
7 Nao hem i holem raethan blong man ya, mo i leftemap hem.+ Mo wantaem nomo, ol bun blong leg blong hem oli kam strong,+
8 nao hem i stanap wantaem+ mo i wokbaot, i folem tufala i go insaed long tempol. Hem i stap wokbaot, i stap jamjam mo i stap presem God.
9 Nao olgeta man oli luk we hem i stap wokbaot, mo i stap presem God.
10 Mo oli luksave se hem nao man ya we i stap sidaon klosap long Naes Doa long tempol,+ i stap wet blong ol man oli givim ol presen blong sore long hem, nao oli glad mo oli sapraes tumas long samting we i hapen long hem.
11 Nao from we olgeta man oli sapraes tumas, oli resis i kam long trifala long ples ya we oli singaot se Vranda Blong Solomon.+ Long ples ya, man ya i stap holemtaet han blong Pita mo Jon.
12 Taem Pita i luk ol man ya, hem i talem long olgeta se: “Ol man Isrel, ?from wanem yufala i sapraes tumas long samting ya, mo yufala i stap lukluk mitufala olsem? ?Yufala i ting se mitufala i yusum prapa paoa blong mitufala, o from we mitufala i fasgud long God, nao mitufala i mekem man ya i wokbaot? !Nogat!
13 God blong ol olfala blong yumi, hemia God blong Ebraham mo Aesak mo Jekob,+ i leftemap nem blong Man Blong Wok blong hem+ Jisas.+ Hem nao we yufala i letem hem i go long han blong ol man,+ mo long fes blong Paelat yufala i talem se yufala i no wantem hem, nating se Paelat i wantem letem hem i go fri.
14 Yes, man ya i wan stret man, mo hem i tabu, be yufala i no wantem hem. Yufala i girap yufala i askem blong oli letem wan man i go fri we hem i man blong kilim man,+
15 nao yufala i kilim i ded Nambawan Man blong givim laef.+ Be God i mekem hem i laef bakegen, mo mifala i witnes long samting ya.+
16 Man ya we leg blong hem i nogud, yufala i luk hem mo yufala i save hem, be naoia hem i kam strong from nem blong Jisas, mo from we mitufala i bilif long nem ya. Bilif ya we mitufala i gat long hem, i mekem man ya i kam gud fulwan olsem we yufala evriwan i luk.
17 Ol brata, mi mi save we yufala i bin mekem samting ya from we yufala i no save,+ olsem ol rula blong yufala oli bin mekem.+
18 Be samting ya i hapen blong God i mekem ol tok blong hem we ol profet oli talemaot bifo, oli kamtru. Ol tok ya oli talem se Kraes blong hem bambae i safa.+
19 “Taswe yufala i mas tanem tingting blong yufala,+ mo yufala i tanraon+ blong Jehova* i tekemaot sin blong yufala,+ nao hem bambae i mekem yufala i gat niufala paoa,
20 mo hem i save sanem Kraes we hem i putumap hem finis se i blong yufala, i kam, yes hemia Jisas.
21 Be hem i mas stap long heven gogo kasem taem we olgeta samting oli kam niuwan bakegen, olsem tok blong hem we ol tabu profet blong hem bifo oli talemaot.
22 Moses i talem se: ‘Jehova* we i God blong yufala bambae i jusumaot wan long ol brata blong yufala blong i kam profet blong yufala, olsem mi.+ Yufala i mas lesin long olgeta samting we hem i talem long yufala.+
23 Man* we i no lesin long Profet ya, God bambae i distroem hem.’+
24 Mo olgeta profet stat long Samuel gogo kasem olgeta we oli kam biaen long hem, olgeta tu oli stap talemaot taem ya tede.+
25 Yufala i pikinini blong ol profet mo blong kontrak ya we God i mekem wetem ol bubu blong yufala,+ taem hem i talem long Ebraham se: ‘Mo tru long pikinini* blong yu, olgeta famle long wol bambae oli kasem blesing.’+
26 Afta we God i mekem Man Blong Wok blong hem i laef bakegen, hem i sanem hem i kam long yufala fastaem,+ blong hem i blesem yufala taem hem i pulum yufala i gowe long ol rabis wok we yufala i stap mekem.”
