Prija 3:1-22
3 I gat wan stret taem blong evri samting,I gat taem blong evri samting we man i mekem long wol:
2 I gat taem blong pikinini i bon, mo i gat taem blong ded,I gat taem blong planem kakae, mo i gat taem blong pulumaot kakae long garen.
3 I gat taem blong kilim man, mo i gat taem blong mekem man i kam gud bakegen,I gat taem blong brebrekemdaon samting, mo i gat taem blong bildimap samting.
4 I gat taem blong krae, mo i gat taem blong laf,I gat taem blong krae bigwan, mo i gat taem blong danis.*
5 I gat taem blong sakemaot ol ston, mo i gat taem blong hivimap ol ston wanples,I gat taem blong putum han i goraon long narafala, mo i gat taem blong no putum han i goraon long narafala.
6 I gat taem blong lukaotem samting, mo i gat taem blong lego wan samting olsem se i lus finis,I gat taem blong holemtaet samting, mo i gat taem blong sakemaot samting.
7 I gat taem blong terem samting,+ mo i gat taem blong somap samting,I gat taem blong stap kwaet,+ mo i gat taem blong toktok.+
8 I gat taem blong lavem narafala, mo i gat taem blong no laekem nating narafala,+I gat taem blong wo, mo i gat taem blong pis.
9 ?Wan man blong wok i kasem wanem from ol samting we hem i stap traehad from?+
10 Mi mi luk finis wok we God i givim long ol man, blong mekem se oli bisi.
11 Evri samting we hem i bin mekem oli naes* long taem blong olgeta.+ Mo tu, hem i putum laef we i no save finis long hat blong olgeta, be nating se i olsem, ol man bambae oli neva faenemaot olgeta wok we tru God i bin mekem, long stat blong olgeta go kasem en blong olgeta.
12 Taswe mi save talem se i no gat wan narafala samting we i gud moa i winim we man i glad, mo i mekem ol gudfala samting taem hem i stap laef,+
13 mo tu, i stret we man i kakae, i dring, mo i glad long ol samting we hem i stap hadwok long hem. Hemia ol presen we i kam long God.+
14 Naoia mi mi save se evri samting we tru God i stap mekem, bambae oli stap gud olwe. I no gat wan samting blong ademap long hem, mo i no gat wan samting blong tekemaot long hem. Tru God i bin mekem ol samting ya olsem, blong ol man bambae oli fraet long hem.+
15 Ol samting we oli stap hapen, oli hapen bifo finis, mo samting we bambae i kam, i sem mak long samting we i kam bifo finis.+ Be tru God i stap lukaotem samting ya we ol man oli stap traehad blong kasem.*
16 Mo mi luk samting ya tu aninit long san, se: Long ples blong jastis i gat nogud fasin, mo long ples blong stret fasin i gat nogud fasin.+
17 Nao long hat blong mi, mi talem se: “Tru God bambae i jajem stret man mo man nogud tu,+ from we i gat wan taem blong lukluk long evri wok mo evri aksen we ol man oli mekem.”
18 Mo tu, long hat blong mi, mi tokbaot ol man se tru God bambae i traem olgeta, mo i soemaot long olgeta se oli sem mak long ol animol,
19 from we i gat wan samting we bambae i hapen long ol man, mo wan samting we bambae i hapen long ol animol. Tufala tugeta bambae i kasem sem samting ya nomo.+ Animol i ded, mo man tu i ded, mo nating se tufala i defren be tufala i gat sem spirit.*+ Taswe man i no hae moa long ol animol, from we evri samting i blong nating nomo.
20 Olgeta evriwan oli stap go long sem ples.+ Olgeta evriwan oli kamaot long das,+ mo olgeta evriwan oli stap gobak long das.+
21 ?Hu i save sipos i tru se spirit blong ol man i go antap, mo se spirit blong ol animol i godaon long graon?+
22 Nao mi luk se i no gat wan samting we i gud moa i bitim we man i harem gud long ol wok blong hem,+ from we hemia nao pei blong hem. ?Hemia from we hu i save letem hem i luk ol samting we bambae oli kamtru biaen long taem ya we hem i no moa stap?+
Ol futnot
^ PT: “jamjam; resis olbaot.”
^ NT: “stap long oda; folem; stret.”
^ MNT: “lukaotem samting we i pas finis.”
^ PT: “paoa blong laef.”
