Leta i go long Rom 7:1-25
7 Ol brata, (mi mi stap toktok long olgeta we oli save loa) ?yufala i no save se taem wan man i laef i stap, Loa i bos long hem?
2 Yufala i traem tingbaot wan woman we i mared. Loa i fasem hem long hasban blong hem taem i laef. Be sipos hasban ya i ded, woman ya i fri long loa blong hasban blong hem.+
3 Sipos woman ya i go maredem narafala man taem hasban blong hem i laef yet, hem i mekem adaltri.+ Be sipos hasban blong hem i ded, woman ya i kam fri long loa blong hem. Nao sipos hem i go maredem narafala man, hem i no mekem adaltri.+
4 Taswe ol brata blong mi, sakrefaes* blong Kraes i mekem se Loa i no moa fasem yufala,+ nao yufala i save kam man blong Kraes ya we God i mekem hem i laef bakegen.+ Long rod ya, yufala i mas mekem ol samting we God i glad long hem.+
5 Long taem ya we yumi stap folem ol samting we bodi i wantem, Loa i soemaot klia ol rabis tingting we oli stap wok long bodi* blong yumi, blong mekem ol samting we oli blong ded nomo.+
6 Be naoia yumi kam fri long Loa+ from we hem i no moa gat paoa long yumi. Taswe yumi kam slef long wan niufala fasin we tabu spirit i lidim,+ be i no long olfala fasin we Loa i lidim.+
7 ?Bambae yumi talem wanem? ?Loa hem i sin? !Nogat! Sipos i no gat Loa, bambae mi no save se sin hem i wanem.+ Eksampol. Sipos Loa i no talem se: “Yu no mas kavetem ol samting blong narafala,” bambae mi mi no save se fasin ya i rong.+
8 Be from loa ya, sin i faenem rod blong pulum mi blong mi kavetem enikaen samting, from we taem i no gat loa, sin i ded.+
9 Taem i no gat loa yet, mi mi laef. Be taem loa i kam, sin i laef bakegen nao mi mi ded.+
10 Mo loa ya we i blong lidim man i go long laef,+ mi mi luk se hem i lidim man i go long ded nomo.
11 Loa ya i mekem se sin i faenem rod blong hem blong trikim mi, mo i yusum loa ya blong kilim mi mi ded.
12 Loa hem wan i tabu, mo ol tok blong hem tu oli tabu, mo oli stret mo oli gud.+
13 ?Olsem wanem? ?Samting we i gud i mekem mi mi ded? !Nogat! Sin nao i kilim mi. Sin i yusum gudfala samting blong kilim mi mi ded, blong soemaot se sin i wanem.+ Mo loa i soemaot se sin i nogud we i nogud.+
14 Yumi save se Loa i kamaot long God, be mi mi man nomo, mi slef blong sin.*+
15 Mi mi no kasemsave long samting we mi stap mekem, from we mi stap mekem samting we mi agensem, be ol samting we mi wantem, mi no mekem.
16 Be sipos mi stap mekem ol samting we mi no wantem, hemia i soemaot we mi agri se Loa i gud.
17 Be naoia i no mi we mi stap mekem ol samting ya, be sin we i stap insaed long mi, hem nao i mekem.+
18 Mi save se mi* mi man nomo, mo i no gat wan gudfala samting insaed long mi. Mi wantem tumas blong mekem samting we i gud, be mi no naf blong mekem.+
19 Mi mi no mekem gudfala samting we mi mi wantem mekem, be mi stap mekem rabis samting we mi no wantem.
20 Sipos mi mi mekem samting we mi no wantem, i no mi we mi mekem samting ya, be hemia sin we i stap long mi.
21 Taswe mi luk se loa ya i stap long mi: Taem mi wantem mekem samting we i stret, be tingting blong mekem i nogud, hem tu i stap long mi.+
22 Long hat blong mi, mi mi laekem tumas loa blong God.+
23 Be mi mi luk wan narafala loa long bodi* blong mi we i stap agensem loa we i stap long tingting blong mi,+ mo i mekem mi mi kalabus long loa blong sin+ we i stap long bodi* blong mi.
24 !Mi mi no glad nating! ?Hu bambae i sevem mi long bodi ya we bambae i mekem se mi ded?
25 !Mi mi talem tangkiu long God from we bambae hem i yusum Masta blong yumi Jisas Kraes blong sevem mi! Taswe long tingting blong mi, mi mi wan slef blong loa blong God, be bodi blong mi hem i slef blong loa blong sin.+
Ol futnot
^ PT: “bodi.”
^ PT: “wok long ol pat blong bodi.”
^ Grik tok we oli yusum long ples ya i givim tingting se wan narafala i salem hem i go long sin.
^ PT: “se long bodi blong mi.”
^ PT: “narafala loa long ol pat blong bodi.”
^ PT: “sin we i stap long ol pat blong bodi.”
