Jekob i save se wosip i mas go long Jehova nomo, nating se Jehova i no putum wan loa yet agensem wosip blong ol aedol. (Eks 20:3-5) Taswe, afta we Jehova i talem long hem blong i gobak long Betel, Jekob i talem long olgeta we oli folem hem se oli mas sakemaot ol aedol blong olgeta. Biaen Jekob i sakem ol aedol ya, wetem ol iaring, we oli stap werem blong givim gudlak long olgeta. (Je 35:1-4) Yumi sua se Jehova i glad bigwan long samting we Jekob i mekem.

Long taem blong yumi, ?olsem wanem yumi soemaot se yumi wosipim Jehova nomo? Fastaem yumi mas sakemaot eni samting we i joen wetem aedol o rabis spirit. Hemia i save minim eni buk we i tokbaot majik o ol samting we yumi wajem long taem blong spel. Taswe, i gud yu askem se: ‘?Mi mi laekem blong ridim ol buk o wajem ol muvi we i tokbaot ol vampaea, sombi, o wok blong rabis spirit? ?Ol samting we mi stap mekem blong spel mo pleplei oli givim tingting se majik mo fasin blong singaot trabol i kam long man i oraet nomo?’ Yumi mas stap longwe long eni kaen samting we Jehova i agensem.—Sam 97:10.

WAJEM VIDEO YA “AGENSEM SETAN,” MO BIAEN YU ANSA LONG OL KWESTIN YA:

• ?Wanem problem i kamaot long laef blong wan Baebol stadi we nem blong hem Palesa?

• ?From wanem i waes blong askem help blong ol elda sipos yu gat problem wetem wok blong rabis spirit?

• ?Wanem ol samting we yumi mas sakemaot sipos yumi wantem se Jehova i protektem yumi?

• ?Wanem desisen we Palesa i mekem kwiktaem?

• ?Long ples blong yu, wanem sam samting we yu save mekem blong sakemaot ol samting we oli joen wetem rabis spirit?