Yumi mas putum wota long ol sid blong trutok we yumi planem finis. (1 Kor. 3:6) Taem yumi faenem man we i intres, i gud yumi stanemap wan kwestin blong ansa long hem nekis taem. Samting ya bambae i mekem se hem i stap wet blong kasem ansa, mo tu, i isi moa blong yumi rere from nekis visit. Taem yumi gobak, yumi talem long hem se yumi kambak blong ansa long kwestin ya.

• Taem yu rerem wan fastok, yu rerem wan kwestin tu we bambae yu ansarem nekis taem. Maet ansa i stap long magasin no buklet we yu stap seremaot. Sipos no, maet yu stanemap wan kwestin we ansa blong hem i stap long wan buk blong stadi, we bambae yu soemaot long hem nekis taem.

• Long en blong storian, yu talem long hem se yu glad blong toktok wetem hem bakegen. Nao yu stanemap kwestin we yu rere long hem finis. Sipos yu mitim hem long rod no long wan narafala ples, yu save askem namba blong telefon blong hem, no yu tokbaot wan narafala rod blong storian bakegen.

• Sipos yu promes blong kambak long wan stret taem, yu mas holem promes ya.—Mat. 5:37.