Long Matiu japta 8 mo 9 i tokbaot wok blong prij we Jisas i mekem long Galili. Taem Jisas i mekem ol sik man oli kam gud bakegen, hem i soemaot paoa blong hem, be samting we i moa impoten, hemia bigfala lav mo sore we hem i gat long ol man.

1. Jisas i hilim wan man we i gat leprosi.—Mt 8:1-3

2. Jisas i hilim wan wokman blong wan soldia.—Mt 8:5-13

   Hem i hilim mama blong waef blong Pita.—Mt 8:14, 15

   Hem i ronemaot ol rabis spirit mo mekem ol sik man oli kam gud bakegen.—Mt 8:16, 17

3. Jisas i tok long ol rabis spirit mo i sanem oli go insaed long ol pig.—Mt 8:28-32

4. Jisas i hilim man we haf bodi blong hem i ded.—Mt 9:1-8

   Jisas i hilim wan woman we i bin tajem klos blong hem, mo i mekem gel blong Jaeras i laef bakegen.—Mt 9:18-26

   Hem i hilim wan blaen man mo man we i no save toktok. —Mt 9: 27-34

5. Jisas i goraon long ol taon mo vilej, blong hilim ol defren kaen sik mo olgeta we bodi blong olgeta i nogud.—Mt 9:35, 36

?Olsem wanem mi save soem lav mo sore long ol man raonabaot long mi?