Traem tingbaot se yu stap laef long Galili long taem blong Jisas. Yu go long Jerusalem blong mekem lafet blong ol Wansaed Haos. Long taon ya i gat plante man blong God we oli kam long ol ples we i longwe. Yu wantem givim wan presen i go long Jehova. Yu tekem wan nani wetem yu, mo yu traem blong pas tru long hip blong ol man long taon ya blong go long tempol. Taem yu kasem tempol, i gat plante man finis we olgeta tu oli wantem mekem sakrefaes. Naoia, i taem blong yu blong givim nani blong yu long pris. Be stret long taem ya, yu tingbaot wan brata blong yu we i gat poen agensem yu, we maet i stap long medel blong ol man long taon ya. Jisas i talem samting we yu mas mekem wetem brata blong yu. (Ridim Matiu 5:24.) ?Olsem wanem yu mo brata blong yu i save folem advaes ya blong Jisas blong mekem pis? Long ol wanwan lis daon, yu putum wan mak blong makem stret ansa.

YU MAS . . .

• toktok nomo long brata blong yu sipos yu save stret wanem we i mekem hem i harem nogud

• stretem tingting blong brata blong yu sipos hem i wan man blong kros kwik o i save tokbaot bisnes ya long ol narafala

• lesin gud taem brata blong yu i talemaot ol filing blong hem nating se yu no kasemsave fulwan samting we hem i talem, be i gud yu talem sore from samting we i spolem filing blong hem, o wan samting we yu bin mekem we yu ting se i gud nomo

BRATA BLONG YU I MAS . . .

• askem help blong ol narafala long kongregesen taem hem i tokbaot wanem we yu mekem long hem

• tok strong long yu, i talemaot evri nogud samting we yu mekem, mo talem se yu nao yu rong

• luksave se yu gat tingting daon mo strong tingting blong go luk hem, mo hem i mas fogivim yu wetem ful hat blong hem

Tede yumi no moa yusum anamol blong mekem sakrefaes. Be, ?Jisas i wantem tijim wanem long fasin blong mekem pis wetem ol brata blong yumi, mo wosip we God i glad long hem?