Long manis Septemba, bambae yumi wok had blong statem ol Baebol stadi long ol haos wanwan wetem buklet ya !Enjoem Laef Olwe! Ol pablisa we oli jusum blong mekem haftaem paenia, oli save mekem 30 aoa. ?Bambae yumi mekem spesel kampen ya olsem wanem?

• Long Wok Blong Prij: Yusum laswan pej blong buklet ya blong pulum intres blong man, mo traem statem wan Baebol stadi. Tingbaot ol man we oli bin soem intres, inkludum ol visit. Nating se oli no bin wantem stadi bifo, be maet naoia bambae oli intres long niufala rod we yumi yusum blong mekem stadi wetem buklet ya. Yumi no mas lego buklet ya i stap long doa taem i no gat man long haos, o sanem long leta i go long ol man we oli no soem intres. Sevis Komiti Blong Kongregesen i save mekem plan blong i gat sam ekstra miting blong prij long manis ya.

• Ol Narafala Rod: Sipos kongregesen blong yu i stap prij long troli, yufala i save putum buklet ya !Enjoem Laef Olwe! tu long troli. Mo talem long ol man we oli soem intres se taem oli tekem buklet ya, oli save kasem wan fri Baebol kos. Long semtaem, soem olsem wanem blong mekem stadi, o mekem plan blong soem long hem samtaem afta. Maet brata we i lukaot long wok blong prij i save mekem plan blong sanem ol ekspiriens pablisa blong go prij long ol bisnes teritori mo statem ol Baebol stadi. Yu save askem tu long wan fren long wok blong stadi Baebol wetem hem, o long ol man we yu mitim olgeta taem yu tekem janis blong prij.

Jisas i talem long yumi blong “pulum [ol man] oli kam disaepol,” mo “tijim olgeta.” (Mt 28:19, 20) I gud spesel kampen ya i halpem yumi blong kasem mak ya blong statem ol Baebol stadi, wetem buklet ya !Enjoem Laef Olwe!