?FROM WANEM I IMPOTEN?: Taem yu stadi yu wan long Baebol, bambae yu “kasem save fulwan se trutok i bigwan olsem wanem, i longfala olsem wanem, i hae olsem wanem, mo i dip olsem wanem.” (Ef 3:18) Hemia i givhan tu blong ol man oli no gat poen agensem yumi, mo blong yumi “gohed blong holemtaet tok blong laef.” (Fil 2:15, 16) Mo tu, stadi wanwan i givhan blong yumi skelem samting we yumi wan i nidim. Taswe, ?olsem wanem yumi save kasem glad mo ol gudfala samting taem yumi ridim mo yumi stadi Baebol?

?OLSEM WANEM BLONG MEKEM?:

• Yusum ol kala blong makem ol vas mo raetem daon ol not long Baebol we yu yusum blong mekem prapa stadi blong yu.

• Askem ol kwestin ya taem yu ridim Baebol: ‘?Hu? ?Wanem? ?Wetaem? ?Wea? ?From wanem? ?Olsem wanem?’

• Faenemaot ol stret save. Yusum ol tul blong risej blong lukaotem wan topik o wan vas blong Baebol

• Tingting dip long samting we yu ridim mo luk olsem wanem samting ya i stret long yu

• Mekem samting we yu lanem i wok long laef blong yu. —Lu 6:47, 48

WAJEM VIDEO YA ‘HOLEMTRONG LONG OL TRUTOK’—TAEM YU STADI YU WAN, MO BIAEN YU ANSA LONG OL KWESTIN YA:

• ?Samfala oli talem se prapa stadi hem i wanem?

• ?From wanem yumi mas prea bifo we yumi mekem prapa stadi blong yumi?

• ?Wanem i save givhan long yumi blong kasemsave samting we yumi ridim?

• ?Wanem ol mak we yumi save putum long Baebol we yumi yusum blong mekem stadi?

• ?From wanem i impoten blong tingting dip taem yumi stadi Baebol?

• ?Yumi mas mekem wanem long ol samting we yumi lanem?