Long 23 Maj, samwe long 12 milian man bambae oli kam joen wetem yumi long Memoriol. Brata we i mekem tok bambae i givim gudfala witnes taem hem i tokbaot bigfala presen we Jehova i givim long yumi, hemia sakrefaes blong Jisas. Bambae hem i tokbaot ol blesing we ol man oli save kasem from sakrefaes ya. (Aes. 11:6-9; 35:5, 6; 65:21-23; Jon 3:16) Be i no brata ya nomo we bambae i givim witnes. Yumi evriwan i save givim wan gudfala witnes taem yumi welkamem ol man. (Rom 15:7) Yu save mekem olsem:

• Yu no go sidaon nomo mo wet blong miting i stat. Be yu go talem halo long ol niuwan, mo olgeta we oli no moa kam long miting longtaem. Yu smael mo yu sekhan long olgeta

• Ating yu wantem givhan moa long olgeta we yu singaot olgeta oli kam. Be yu no mas fogetem ol narafala we maet oli kam from we oli kasem wan pepa we i singaot olgeta. Yu save tekem wan long olgeta i go sidaon wetem yu. Yu serem Baebol mo singbuk blong yu wetem hem

• Taem miting i finis, yu soemaot se yu glad blong ansa long ol kwestin we maet ol niuwan oli gat. Sipos yufala i mas aot kwik blong wan narafala kongregesen i kam insaed, yu save mekem plan blong go luk man ya long ol dei we oli kam. Sipos yu no save haos blong hem, yu talem se: “Mi mi glad blong storian moa wetem yu long saed blong miting ya. Maet mi save ring long yu, no mi kam luk yu long haos blong yu.”