Tede yumi stap kasem moa disasta i bitim bifo. Mo long taem blong ol disasta olsem, i gat bigfala wok i stap blong oganaesem ol rilif saplae mo givimaot olgeta. From samting ya, Hed Kampani i mekem plan se long wanwan branj ofis i mas gat wan Disasta Rilif Dipatmen.

Nao taem i gat disasta long wan ples, ol brata long dipatmen ya bambae oli kwik blong kontaktem ol elda long ples ya blong faenemaot samting we ol pablisa oli nidim. Sipos i gat sam bigfala damej we ol pablisa oli no naf blong fiksim olgeta wan, branj ofis bambae i sanem sam brata we oli gat gudhan blong oli givhan mo lidim ol wok. Ol brata ya oli save askem sam moa volontia blong givhan, o askem sam tul we narafala i glad blong givim, o maet oli save pem ol rilif saplae blong givimaot.

Taem ol brata oli folem ol rod ya, be i no prapa tingting blong olgeta, bambae oli no konfius, no westem mane o ol samting we oli pem, mo oli no nid blong mekem dabol wok.

Ol brata we branj ofis i putumap olgeta, oli save talem hamas mane bambae oli nidim o hamas volontia i save givhan. Mo tu, oli save askem sam haeman blong kantri blong givhan blong mekem se wok blong givimaot rilif saplae i spid moa. So wanwan man i no mas mekem plan blong askem mane long ol narafala, sanem ol rilif saplae, o travel i go long ples we i gat disasta sipos oli no askem olgeta blong mekem olsem.

Be maet yumi wantem givhan tu taem i gat disasta. (Hib 13:16) Yumi lavem ol brata mo sista blong yumi, ?so yumi save givhan olsem wanem? Wan impoten samting hemia se yumi save prea from olgeta we oli kasem disasta, mo olgeta we oli stap givhan. Mo tu, yumi save givim mane blong sapotem ol wok long fulwol. Ol branj ofis oli stap folem advaes blong Hed Kampani so oli save olsem wanem blong yusumgud ol mane ya. Mo sipos yumi wantem volontia, yumi save talemaot se yumi rere blong fulumap fom ya Local Design/Construction Volunteer Application (DC-50).

WAJEM VIDEO YA BIGFALA FLAD WE I SPOLEM BRASIL, BIAEN ANSA LONG OL KWESTIN YA:

Taem bigfala flad i hapen long Brasil long 2020, ?yu yu laekem wanem long rilif wok we ol Witnes blong Jehova oli mekem?