Blong mekem God i glad, ol Baebol studen oli mas gat strong bilif. (Hib 11:6) Sipos yumi yusum buk ya !Enjoem Laef Olwe! bambae yumi kasem hat blong olgeta. Long buk ya, i gat ol vas blong Baebol, ol stamba poen, ol gudfala kwestin, ol video, mo ol naesfala pija. Taem yumi halpem ol studen blong oli wokem ol Kristin fasin mo blong oli fren gud wetem God, yumi stap givhan long olgeta blong oli stanap strong longtaem.—1Ko 3:12-15.

Sam man oli harem se oli no save kam fren blong God, from we oli no save luk hem. Taswe yumi mas halpem olgeta blong oli save Jehova mo trastem hem.

WAJEM VIDEO YA YUSUM “!ENJOEM LAEF OLWE!” BLONG BILDIMAP BILIF LONG JEHOVA, BIAEN ANSA LONG OL KWESTIN YA:

• ?Wanem i soem se sista ya i rerem gud stadi blong hem?

• ?Olsem wanem hem i yusum gud ol kwestin blong pulum studen blong i talemaot ol filing blong hem long vas blong Aesea 41:10, 13?

• ?Olsem wanem video mo ol vas blong Baebol oli tajem hat blong studen?

Plante man oli no kasemsave long ransom, o oli no luk olsem wan presen we God i givim long olgeta. (Ga 2:20) Taswe yumi mas halpem olgeta blong oli gat bilif long ransom sakrefaes blong Jisas.

WAJEM VIDEO YA YUSUM “!ENJOEM LAEF OLWE!” BLONG BILDIMAP BILIF LONG JISAS, BIAEN ANSA LONG OL KWESTIN YA:

• ?Wanem i soem se brata ya i rerem gud stadi blong hem?

• ?Olsem wanem hem i yusum gud haf ya “Faenemaot” blong halpem studen?

• ?From wanem i impoten blong prea from studen?