FROM WANEM I IMPOTEN: Prij long telefon i wan impoten rod blong ‘talemaot gud nius long olgeta ples.’ (Wok 20:24) * Hem i halpem yumi blong givim witnes long narafala taem sam samting i blokem yumi blong visitim hem.

OLSEM WANEM BLONG MEKEM:

• Rere gud. Jusum wan topik we i stret. Biaen, raetem plan blong ol samting we yu wantem talem. Maet yu save rerem wan sot mesej we i eksplenem from wanem yu kol, sipos yu kasem ansaring masin. I gud blong sidaon long tebol, mo putum plan blong yu wetem ol nara samting we yu nidim long fored blong yu, olsem tablet o kompiuta we i open finis long JW Library^® o jw.org^®

• Rilaks. Toktok olsem we yu stap stori nomo. Smael mo muvum bodi olsem se man ya i stap lukluk yu. No stopstop tumas taem yu toktok. I gud blong gat wan narawan i stap wetem yu. Sipos man blong haos i askem wan kwestin, ripitim kwestin ya long bigfala voes, blong fren blong yu i save givhan blong faenem ansa

• Putum fandesen blong nekis visit. Sipos man i intres, livim wan kwestin we yu save ansarem long nekis kol. Maet yu save tokbaot wan buk o magasin, mo askem hem sipos yu save sanem tru long imel, o go givim stret long hem. O yu save askem blong sanem sam atikol o video long hem tru long teks o imel. Taem i stret, tokbaot sam samting we i stap long websaet blong yumi