I no longtaem bambae longfala tingting blong Jehova i kasem limit blong hem. Nao ol giaman relijen bambae oli lus, ol nesen bambae oli joen tugeta blong spolem ol man blong God mo Jehova bambae i spolem ol rabis man long Amagedon. Ol Kristin oli stap luk fowod long impoten taem ya.

I tru yumi no save evri samting we bambae i hapen long taem blong bigfala trabol. Eksampol, yumi no save wetaem bambae hem i stat. Yumi no save wanem risen i pulum ol man blong politik blong atakem ol relijen. Yumi no save se bambae oli yusum wanem blong atakem ol man blong God mo bambae i stap longtaem o sot taem nomo. Mo tu yumi no save stret samting we Jehova bambae i yusum blong spolem ol rabis man long Amagedon.

Nating se i olsem, Baebol i talemaot evri samting we yumi nidim blong stanap strong mo luk fowod long fiuja. Eksampol, yumi save se yumi laef long en blong “ol las dei.” (2Ti 3:1) Yumi save se taem oli atakem ol relijen, Jehova bambae i “katem taem” blong oli no spolem trufala relijen. (Mt 24:22) Yumi save se bambae Jehova i sevem ol man blong hem. (2Pi 2:9) Mo yumi save se Man ya we Jehova i jusum blong spolem ol rabis man mo protektem bigfala kampani we bambae i pastru long Amagedon, hem i gat paoa mo stret fasin.—Re 19:11, 15, 16.

Ol samting we bambae oli hapen long fiuja, bambae i mekem ol man oli “hafded from we oli fraet tumas.” Be sipos yumi ridim mo tingting dip long ol stori blong Jehova we i sevem ol man blong hem bifo, mo ol samting we hem i talem long saed blong fiuja, bambae yumi save ‘stanap stret mo leftemap hed blong yumi,’ from we yumi save se klosap nao bambae yumi fri.—Lu 21:26, 28.