Toktok Tumas: Yu no ting se yu wan nomo yu mas toktok. Yu mas askem kwestin tu. Jisas i askem kwestin blong givhan long ol man blong oli kasemsave samting we hem i stap tokbaot. (Mt 17:24-27) Ol kwestin oli mekem se stadi i laef. Mo tu, oli givhan long yu blong yu save bilif blong studen, mo blong yu save sipos hem i kasemsave. (be pej 253 haf 2-3) Afta we yu askem kwestin, yu mas gat longfala tingting mo wet long ansa. Sipos studen i talem ansa we i no stret, yu no talem stret ansa long hem, be yu askem wan narafala kwestin we i lidim hem i go long stret ansa.(be pej 238 haf 1-2) Taem yu tokbaot wan samting we studen i no save yet, yu mas toktok slo blong hem kasemsave long samting ya.—be pej 230 haf 4.

Tokbaot Evri Samting: Yu blokem trap ya blong tokbaot evri smosmol samting. (Jon 16:12) Yu tokbaot nomo ol bigfala tingting we i stap long ol haf. (be pej 226 haf 4 mo pej 227 haf 1) Sipos yu tokbaot evri smosmol samting, yu save mestem bigfala tingting. (be pej 235 haf 3) Taem studen i kasemsave bigfala tingting long wan haf, yu muv i go long narafala haf.

Finisim Buk Nomo: Mak blong yumi i blong kasem hat blong man, i no blong finisim buk nomo. (Lu 24:32) Tok blong God i gat paoa, taswe yu mas ridim ol stamba vas we i stap long wan haf. (2Ko 10:4; Hib 4:12; be pej 144 haf 1-3) Yu yusum ol pijatok we i isi blong studen i kasemsave. (be pej 245 haf 2-4) Yu tingbaot bilif blong hem mo ol samting we i stap traem hem, mo yu mekem stadi i laenap wetem ol samting ya. Yu askem ol kwestin olsem: “?Wanem tingting blong yu long samting we yu lanem?” “?Wanem fasin blong Jehova we yu lanem long haf ya?” “?Advaes ya i save givhan long yu olsem wanem?”—be pej 238 haf 4-6; pej 259 haf 1.