Long Novemba bambae i gat wan spesel kampen blong serem gud nius ya se niufala wol i klosap. (Sam 37:10, 11; Re 21:3-5) I gud yumi mekem spesel traehad blong jenisim program blong yu blong save joen fulwan long kampen ya. Sipos yu plan blong mekem haftaem paenia long manis ya, yu save jusum blong mekem 30 o 50 aoa.

Rere blong serem wan vas blong Baebol long plante moa man. Taem yu stap jusum wan vas blong Baebol, tingbaot samting we i save tajem hat blong ol man long teritori blong yu. Sipos yu faenem wan man long wok blong prij we i intres, givim wan kopi blong Wajtaoa pablik N. 2, 2021. Biaen, traehad blong visitim hem kwiktaem mo traem statem wan Baebol stadi wetem hem long buklet ya !Enjoem Laef Olwe! !Hemia wan nambawan taem blong joen long wok ya blong serem “gud nius blong samting we i gud moa”!—Aes 52:7.

WAJEM VIDEO BLONG ORIGINAL SINGSING YA LONG WAN NIUFALA WOL, BIAEN ANSA LONG OL KWESTIN YA:

• ?Smol gel ya i stap tingbaot wanem gudfala fiuja?

• ?Yu yu wantem mekem wanem long niufala wol?

• Taem yu tingting dip long hop we yu gat, ?olsem wanem samting ya i givhan long yu blong joen fulwan long kampen blong Novemba?—Lu 6:45