?Hu i wokem heven mo wol? ?Olsem wanem san, mun, ol sta, mo ol narafala samting long wol, oli kamaot? Baebol i givim stret ansa, i talem se God i wokem olgeta samting ya. Ol faswan Baebol stori long buk ya oli tokbaot taem we God i wokem olgeta samting.

Bambae yumi kasem save se, fastaem, God i wokem ol spirit man we oli lelebet olsem hem. Hemia ol enjel. Biaen, hem i wokem wol, blong ol man olsem yumi oli save stap long hem. Hem i wokem wan man mo wan woman, Adam mo Iv, mo i putum tufala i stap long wan naesfala garen. Be tufala i no obei long God, ale tufala i ded.

Stat long taem we God i wokem Adam go kasem taem we Bigfala Wota i ron, 1,656 yia i pas. Plante rabis man oli stap laef long ol yia ya. Long heven, i gat plante rabis spirit man we ol man blong wol oli no save luk olgeta, hemia Setan mo ol enjel blong hem. Long wol, i gat Ken mo plante narafala rabis man, wetem sam bigbigfala man we oli strong bitim mak. Be i gat sam gudfala man long wol tu, olsem Ebel, Inok, mo Noa. Long Haf WAN, bambae yumi ridim stori blong ol man ya mo ol samting we i hapen long taem ya.