Stori 1: God i Stat Wokem Ol Samting
OLGETA gudfala samting we yumi gat oli kamaot long God. Hem i wokem san blong givim laet long yumi long dei, mo mun mo ol sta blong mekem se yumi gat laet long naet. Mo God i wokem wol ya, blong yumi save stap long hem.
Be san, mun, ol sta mo wol oli no ol faswan samting we God i wokem. ?Yu save wanem samting we God i wokem fastaem? Hem i wokem sam spirit man we oli olsem hem. Yumi no save luk ol spirit man, olsem we yumi no save luk God. Baebol i kolem ol man ya se ol enjel. God i wokem ol enjel blong oli laef wetem hem long heven.
Faswan enjel we God i wokem, hem i spesel. Hem i fasbon Pikinini blong God, mo i wok wetem Papa blong hem. Hem i halpem God blong wokem olgeta narafala samting. Hem i halpem God blong wokem san, mun, ol sta mo wol ya tu.
?Wol ya i olsem wanem long taem ya? Long stat blong wol, man i no save laef long hem. Bigfala wota i kavremap olgeta ples. Be God i wantem we ol man oli save laef long wol ya. Taswe hem i stat blong mekem ol samting oli rere blong yumi. ?Hem i mekem wanem?
Faswan samting we wol i nidim, hemia laet. Taswe God i mekem se san i saen blong givim laet long wol. Olsemia, hem i mekem delaet mo hem i mekem tudak, dei mo naet. Afta, God i mekem se graon i kamaot long medel blong wota, nao wota i no moa kavremap olgeta ples.
Fastaem, i no gat wan samting long graon. Hem i olsem we yumi luk long pija ya. I no gat flaoa mo tri mo anamol long graon ya. I no gat fis tu long solwota. God i gat plante wok blong mekem yet, blong wol ya i save kam wan gudfala ples blong ol anamol mo man.
Jeremaea 10:12; Kolosi 1:15-17, NW; Jenesis 1:1-10.
Ol Kwestin
- ?Hu i givim olgeta gudfala samting long yumi? ?Yu save talem wan gudfala samting we hem i givim?
- ?Fastaem God i wokem wanem samting?
- ?From wanem faswan enjel i spesel?
- ?Wol ya i olsem wanem fastaem? (Lukluk pija.)
- ?God i mekem wanem blong rerem wol from ol anamol mo man?
Sam narafala kwestin
- Ridim Jeremaea 10:12
?Taem yu lukluk ol samting we God i wokem, yu luk se Hem i gat wanem fasin? (Aes. 40:26; Rom 11:33)
- Ridim Kolosi 1:15-17, NW.
?Olsem wanem Jisas i givhan blong wokem ol samting? ?Samting ya i mas mekem se yumi gat wanem tingting long saed blong Jisas? (Kol. 1:15-17, NW)
- Ridim Jenesis 1:1-10
?Wol ya i stat olsem wanem? (Jen. 1:1)
?God i wokem wanem long faswan dei? (Jen. 1:3-5)
?God i wokem wanem long seken dei? (Jen. 1:7, 8)