Stori 6: Wan Gudfala Boe, Mo Wan Nogud Boe
YU LUK Ken mo Ebel long pija ya. Tufala i bigwan finis. Ken i kam wan man blong wokem garen. Hem i planem ol kakae olsem frut mo kabej.
Ebel i kam wan man blong lukaot long ol sipsip. Hem i laekem blong lukaot long ol smosmol sipsip. Taem ol sipsip ya oli gruap, oli karem sam narafala sipsip bakegen, gogo Ebel i gat plante sipsip blong lukaot long olgeta.
Wan dei, Ken mo Ebel i givim wan presen i go long God. Ken i givim sam kakae blong garen. Ebel i givim beswan sipsip we hem i gat. Jeova i glad long Ebel mo presen blong hem. Be hem i no glad long Ken mo presen blong hem. ?Yu save from wanem?
Hemia i no jes from we presen blong Ebel i moa gud i bitim presen blong Ken. Be hemia from we Ebel i wan gudfala man. Hem i lavem Jeova mo i lavem brata blong hem. Be Ken i wan nogud man; hem i no laekem brata blong hem.
Taswe God i talem long Ken se hem i mas jenisim fasin blong hem. Be Ken i no wantem lesin. Hem i kros tumas from we God i laekem Ebel moa. Ale Ken i talem long Ebel se: ‘Ei, yumitufala i go long garen.’ Long ples ya, taem tufala nomo i stap, Ken i kilim brata blong hem Ebel, nao Ebel i ded. ?Yu ting se samting we Ken i mekem i gud no i nogud?
Nating se Ebel i ded, God i stap tingbaot hem yet. Ebel i wan gudfala man, mo Jeova i no save fogetem wan man olsem. Taswe, wan dei, bambae Jeova i mekem Ebel i laef bakegen. Long taem ya, bambae Ebel i gat janis blong no moa ded bakegen samtaem. Bambae hem i save laef long wol ya gogo i no save finis. ?Bambae yu yu glad blong toktok wetem ol man olsem Ebel?
Be God i no glad long ol man olsem Ken. Taswe, afta we Ken i kilim brata blong hem i ded, God i panisim hem. Hem i ronemaot Ken i go farawe long ol famle blong hem. Taem Ken i go stap long wan narafala ples long wol, hem i tekem wan long ol sista blong hem i go wetem hem, mo gel ya i kam woman blong hem.
Biaen, Ken mo woman blong hem tufala i gat pikinini. Ol narafala boe mo gel blong Adam mo Iv oli mared tu, mo oli gat pikinini. Smoltaem biaen, i gat plante man long wol. Bambae yumi storebaot sam long olgeta.
Jenesis 4:2-26; 1 Jon 3:11, 12; Jon 11:25.
Ol Kwestin
- ?Ken mo Ebel tufala i mekem wanem wok?
- ?Ken mo Ebel tufala i givim wanem presen i go long Jeova?
- ?From wanem Jeova i glad long presen we Ebel i givim? ?From wanem Jeova i no glad long presen we Ken i givim?
- ?Wanem fasin blong Ken? ?Jeova i talem wanem long Ken blong traem stretem tingting blong hem?
- ?Taem Ken mo brata blong hem tufala nomo i stap long garen, Ken i mekem wanem?
- ?Wanem i hapen long Ken afta we hem i kilim brata blong hem i ded?
Sam narafala kwestin
- Ridim Jenesis 4:2-26.
?Jeova i talem wanem long Ken blong soem se hem i stap long denja? (Jen. 4:7)
?Ken i talem wanem blong soemaot samting we i rili stap long hat blong hem? (Jen. 4:9)
?Wanem tingting blong Jeova long man we i kilim narafala i ded? (Jen. 4:10; Aes. 26:21)
- Ridim 1 Jon 3:11, 12.
?From wanem Ken i kros tumas? ?Samting ya i givim wanem woning long yumi tede? (Jen. 4:4, 5; Prov. 14:30; 28:22)
?Baebol i talem wanem blong soem se yumi save holemstrong long Jeova, nating se olgeta famle blong yumi oli agensem Hem? (Sam 27:10; Mat. 10:21, 22)
- Ridim Jon 11:25.
?Wanem promes we Jeova i mekem long ol man we oli ded from stret fasin? (Jon 5:24)