Stori 7: Wan Man We i No Fraet
OL MAN oli stap kam plante long wol. Mo plante long olgeta oli mekem ol nogud fasin, olsem Ken. Be i gat wan man we i defren. Nem blong hem, Inok. Inok i wan man we i no save fraet. Nating se ol man raonabaot long hem oli mekem plante nogud samting, be Inok i gohed blong mekem wok blong God.
?Yu save from wanem ol man long taem ya oli mekem plante nogud samting? Traem tingbaot: ?Hu i mekem se Adam mo Iv i no moa obei long God? ?Hu i pulum tufala blong tufala i kakae frut ya we God i putum tabu long hem? Yes, hemia wan nogud enjel. Baebol i kolem hem se Setan. Mo hem i stap traem blong pulum olgeta man blong oli kam nogud.
Wan dei, Jeova God i askem long Inok blong talemaot long ol man sam tok we oli no glad blong harem. Hemia tok ya se: ‘Bambae God i spolem olgeta man nogud.’ I sua se tok ya i mekem ol man oli kros. Ating oli traem blong kilim Inok i ded. Taswe, Inok i rili nidim fasin no fraet, blong hem i save talemaot long ol man ol samting we God bambae i mekem.
God i no letem Inok i laef longtaem wetem ol nogud man ya. Inok i laef gogo hem i gat 365 yia nomo. ?From wanem yumi talem “365 yia nomo”? From we ol man long taem bifo oli strong moa long yumi, mo oli laef longtaem moa i bitim yumi. !Tingbaot, pikinini blong Inok, we nem blong hem Metusela, hem i laef 969 yia!
Afta we Inok i ded, ol man oli kam nogud moa. Baebol i talem se ‘oltaem, tingting blong olgeta i fulap long ol samting nogud,’ mo ‘wol i kam fulap long raf fasin.’
?Yu save wan samting we i mekem se i gat plante trabol long wol long taem ya? Hemia from we Setan i faenem wan niufala rod blong pulum ol man blong oli mekem ol nogud samting. Long nekis stori, bambae yumi tokbaot samting ya.
Jenesis 5:21-24, 27; 6:5; Hibrus 11:5, NW; Jud 14, 15.
Ol Kwestin
- ?Wanem i mekem se Inok i defren long ol narafala man?
- ?From wanem ol man long taem blong Inok oli mekem plante nogud samting?
- ?Wanem ol nogud samting we oli mekem? (Lukluk pija.)
- ?From wanem Inok i nidim fasin no fraet?
- ?Ol man long taem bifo, oli laef hamas yia? ?Be Inok i laef hamas yia?
- ?Wanem i hapen afta we Inok i ded?
Sam narafala kwestin
- Ridim Jenesis 5:21-24, 27.
?Inok i fren wetem Jeova no nogat? (Jen. 5:24)
?Hu man long Baebol we i olfala moa? ?Man ya i laef blong hamas yia? (Jen. 5:27)
- Ridim Jenesis 6:5.
?Afta we Inok i ded, wol i kam olsem wanem? ?Hemia i sem mak long wol blong yumi tede? (2 Tim. 3:13)
- Ridim Hibrus 11:5, NW.
?Wanem fasin blong Inok we i mekem se God i “glad tumas long hem”? ?From samting ya, God i mekem wanem long hem? (Jen. 5:22)
- Ridim Jud 14, 15.
?Olsem wanem ol Kristin tede oli save gat fasin no fraet olsem Inok, taem oli stap givim woning long ol man se faet blong Amagedon i klosap? (2 Tim. 4:2; Hib. 13:6)