?YU YU save faswan samting we Noa i mekem taem hem mo famle blong hem oli kamaot long bigfala sip? Hem i givim wan presen i go long God. Long pija ya, yu save luk we hem i stap mekem samting ya. Noa i mekem sakrefaes blong ol anamol ya blong talem tangkiu long God from we God i sevem famle blong hem.

?Yu ting se Jeova i glad long presen ya? Yes, hem i glad. Taswe hem i mekem promes long Noa se neva bambae hem i spolem wol ya bakegen long wan bigfala wota.

I no longtaem, graon i kam drae olgeta, nao Noa mo famle blong hem oli statem wan niufala laef afsaed long sip. God i blesem olgeta mo i talem long olgeta se: ‘Yufala i mas gat plante pikinini. Mo oli mas go stap long olgeta ples blong wol.’

Be taem ol man oli harem stori ya blong bigfala wota, i sua se oli fraet we wan trabol olsem i save kamaot bakegen samtaem. Taswe God i putum wan samting long skae blong mekem ol man oli tingbaot promes blong hem se bambae hem i no save spolem wol ya bakegen long wan bigfala wota. ?Yu save wanem samting hem i putum long skae? Hemia renbo.

Plante taem, yumi luk wan renbo long skae taem ren i finis nao san i saen bakegen. I gat plante naesfala kala long renbo. ?Yu yu luk wan renbo finis? ?Yu luk hemia we i stap long pija ya?

God i talem se: ‘Bambae mi no save spolem bakegen olgeta man mo anamol long bigfala wota olsem. Taem renbo i stap long klaod, bambae mi mi luk hem, mo bambae mi tingbaot promes ya we mi mekem long yufala.’

?Taswe taem yu luk wan renbo, yu mas tingbaot wanem? Yes, promes blong God se neva bambae hem i spolem wol ya bakegen long bigfala wota.

Jenesis 8:18-22; 9:9-17.