Stori 13: Ebraham—Wan Fren Blong God
AFTA we Bigfala Wota i draonem wol, ol man oli go stap long ol defdefren ples. Wan long ol ples ya, hemia taon ya Uru. Uru i wan bigfala taon we i gat ol naes haos long hem. Be ol man long ples ya oli wosipim ol giaman god. Ol man blong taon ya Babel, olgeta tu oli mekem fasin ya. Ol man blong Uru mo Babel oli no olsem Noa mo pikinini blong hem Sem, we tufala i gohed blong mekem wok blong Jeova.
Samwe 350 yia afta we bigfala wota i ron, gudfala man ya Noa we i obei long God, hem i ded. Tu yia biaen long samting ya, man we yu luk long pija ya hem i bon. God i tingbaot man ya olsem wan nambawan man. Nem blong hem, Ebraham. Hem wetem famle blong hem oli stap long taon ya, Uru.
Wan dei, Jeova i talem long Ebraham se: ‘Yu mas aot long Uru mo long ol famle blong yu, mo yu mas go stap long wan narafala kantri we bambae mi soem long yu.’ ?Olsem wanem? ?Ebraham i obei long God, mo i lego olgeta gudfala samting blong Uru? Yes, hem i obei. Ebraham i obei oltaem long God, taswe ol man oli singaot hem se fren blong God.
Sam famle blong Ebraham oli folem hem taem hem i aot long Uru. Papa blong hem, Tera, i folem hem. Lot we hem i boe blong brata blong Ebraham, hem tu i aot wetem Ebraham. Mo, yumi save se Ebraham i mas tekem woman blong hem Sera i go wetem hem. Samtaem biaen, oli kasem ples ya Haran, mo Tera i ded long ples ya. Hemia i longwe long Uru.
Afta we taem i pas, Ebraham mo kampani blong hem oli lego Haran, mo oli wokbaot i go long Kenan. Long ples ya, Jeova i talem long Ebraham se: ‘Hemia nao graon we bambae mi givim long ol pikinini blong yu.’ Ale, Ebraham i stap long Kenan long wan haos tapolen.
God i givhan long Ebraham, i mekem se ol sipsip mo ol narafala anamol blong hem oli kam plante. I gat plante handred man we oli wok blong hem tu. Be Ebraham mo Sera i no gat pikinini.
Taem Ebraham i gat 99 yia, Jeova i mekem promes ya long hem se: ‘Bambae yu yu kam papa blong plante laen blong man.’ ?Be olsem wanem samting ya i save hapen? Ebraham mo Sera i no save gat pikinini, from we tufala i olfala finis.
Jenesis 11:27-32; 12:1-7; 17:1-8, 15-17; 18:9-19.
Ol Kwestin
- ?Wanem fasin blong ol man long taon ya Uru?
- ?Hu ya man ya we i stap long pija? ?Wetaem hem i bon? ?Hem i stap wea?
- ?Wanem samting we God i talem long Ebraham blong mekem?
- ?From wanem Ebraham i fren blong God?
- ?Ebraham i tekem hu i go wetem hem taem hem i aot long Uru?
- ?Taem Ebraham i kasem Kenan, God i talem wanem long hem?
- ?Taem Ebraham i gat 99 yia blong hem, God i mekem wanem promes long hem?
Sam narafala kwestin
- Ridim Jenesis 11:27-32.
?Lot mo Ebraham tufala i famle olsem wanem? (Jen. 11:27)
?Nating we Baebol i talem se Tera i tekem famle blong hem i go long Kenan, be olsem wanem yumi save se Ebraham nao i gat tingting ya fastaem? ?From wanem hem i mekem olsem? (Jen. 11:31; Wok 7:2-4)
- Ridim Jenesis 12:1-7.
?Taem Ebraham i kasem Kenan, olsem wanem Jeova i givim moa save long saed blong promes we hem i mekem finis? (Jen. 12:7)
- Ridim Jenesis 17:1-8, 15-17.
?Taem Ebraham i gat 99 yia blong hem, Jeova i jenisim nem blong hem i kam wanem? ?From wanem? (Jen. 17:5)
?Jeova i promes blong givim wanem blesing long Sera? (Jen. 17:15, 16)
- Ridim Jenesis 18:9-19.
?Folem tok blong Jenesis 18:19, ol papa oli gat wanem wok blong mekem? (Dut. 6:6, 7; Efes. 6:4)
?Wanem i hapen long laef blong Sera we i soem se yumi no save haedem samting long Jeova? (Jen. 18:12, 15; Sam 44:21)
