Stori 18: Jekob i Wokbaot i Go Long Haran
?YU YU save hu ol man ya we oli stap toktok wetem Jekob? Afta we Jekob i wokbaot plante dei, hem i luk ol man ya klosap long wan wel. Oli stap lukaot long ol sipsip blong olgeta. Jekob i askem long olgeta se: ‘?Yufala i man wea?’
Oli talem se: ‘Mifala i man Haran ya.’
Jekob i askem se: ‘?Yufala i save man ya Laban?’
Oli ansa se: ‘Yes. Yu luk, hemia gel blong hem, Rejel, we i stap wokbaot i kam wetem ol sipsip blong hem.’ ?Yu yu save faenem Rejel long pija ya?
Taem Jekob i luk Rejel we i gel blong angkel blong hem, Laban, wetem ol sipsip blong hem, hem i go long wel, i rolemaot ston ya we i blokem maot blong wel, i givim wota long ol sipsip ya. Nao Jekob i kis long Rejel mo i talemaot hem se hem i hu. Rejel i glad tumas, hem i resis i gobak long haos blong talem nius ya long papa blong hem, Laban.
Laban i glad tumas we Jekob i stap wetem olgeta. Mo taem Jekob i askem sipos hem i save tekem Rejel olsem woman blong hem, Laban i glad. Be hem i talem long Jekob se hem i mas wok seven yia, blong hem i save mared long Rejel. Jekob i glad, from we hem i lavem Rejel tumas. ?Be, taem tufala i mared, yu save wanem samting i hapen?
Laban i no givim Rejel long Jekob, be i givim faswan gel blong hem long ples blong Rejel. Afta we Jekob i wok blong seven moa yia, Laban i jes givim Rejel long hem. Long taem ya, God i letem ol man blong oli save gat bitim wan woman blong olgeta. Be tede, olsem Baebol i talem, man i mas gat wan woman blong hem nomo.
Jenesis 29:1-30.
Ol Kwestin
- ?Hu ya yangfala woman long pija ya? ?Jekob i mekem wanem blong givhan long woman ya?
- ?Jekob i rere blong mekem wanem blong hem i save tekem Rejel i kam woman blong hem?
- ?Laban i mekem wanem long taem ya we Jekob i mas mared long Rejel?
- ?Jekob i agri blong mekem wanem blong i save tekem Rejel i kam woman blong hem?
Sam narafala kwestin
- Ridim Jenesis 29:1-30.
?Taem Laban i trikim Jekob, olsem wanem Jekob i soem se hem i wan gudfala man? ?Mo yumi save lanem wanem samting from? (Jen. 25:27; 29:26-28; Mat. 5:37)
?Olsem wanem eksampol blong Jekob i soem se trufala lav i defren long giaman lav? (Jen. 29:18, 20, 30; Sing 8:6)
?Hu ya fofala woman we oli stap long haos blong Jekob mo biaen oli gat pikinini wetem hem? (Jen. 29:23, 24, 28, 29)
