Stori 31: Moses Mo Eron i Go Luk Fero
TAEM Moses i gobak long Ijip, hem i tokbaot ol merikel ya long brata blong hem Eron. Mo taem Moses mo Eron tufala i soem ol merikel ya long ol man Isrel, ol man ya oli bilif we Jeova i stap wetem tufala.
Ale Moses mo Eron tufala i go luk Fero. Tufala i talem long hem se: ‘Jeova we i God blong ol man Isrel i talem se, “Yu mas letem ol man blong mi oli wokbaot tri dei, blong oli save go mekem wosip long mi long drae ples.” ’ Be Fero i ansa se: ‘Mi mi no bilif long Jeova ya. Mo bambae mi no letem ol man Isrel oli go.
Fero i kros, from we ol man Isrel oli wantem spel smol blong go mekem wosip long Jeova. Ale, hem i fosem olgeta blong wok strong moa. Ol man Isrel oli talem se Moses nao i mekem we Fero i strong moa long olgeta. Samting ya i mekem Moses i harem nogud. Be Jeova i talem long hem blong no wari, i se: ‘Bambae mi mekem we Fero i letem ol man blong mi oli go.’
Moses mo Eron tufala i go luk Fero bakegen. Long taem ya, tufala i mekem wan merikel. Eron i sakem wokingstik blong hem i godaon long graon, mo wokingstik ya i jenis i kam wan bigfala snek. Be ol waes man blong Fero tu oli sakem wokingstik blong olgeta i godaon mo ol stik ya tu oli kam ol snek. !Be traem luk wanem i hapen! Snek blong Eron i stap solemdaon ol snek blong ol waes man. Nating se i olsem, Fero i strong yet, i no wantem letem ol man Isrel oli go.
Ale, Jeova i mekem se Fero i lanem wan bigfala lesen. ?Yu save olsem wanem hem i mekem olsemia? Hem i mekem 10 panis no 10 bigfala trabol, i kamaot long Ijip.
Afta we sam panis oli kamaot, Fero i singaot Moses i kam, nao i talem long hem se: ‘Yu mas stopem ol panis ya, nao bambae mi letem ol man Isrel oli go.’ Be taem ol panis ya oli stop, Fero i jenisim tingting blong hem bakegen. Hem i no moa letem ol man Isrel oli go. Be, afta long namba 10 panis, Fero i sanemaot ol man Isrel.
?Yu save talem ol 10 panis ya?
Eksodas 4:27-31; 5:1-23; 6:1-13, 26-30; 7:1-13.
Ol Kwestin
- ?Wanem tingting blong ol man Isrel taem Moses mo Eron i mekem ol merikel long fored blong olgeta?
- ?Moses mo Eron i talem wanem long Fero? ?Fero i ansa olsem wanem?
- ?Pija ya i soemaot wanem samting we i hapen taem Eron i sakem wokingstik blong hem i godaon long graon?
- ?Olsem wanem Jeova i mekem se Fero i lanem wan bigfala lesen? ?Fero i mekem wanem biaen?
- ?Afta long namba 10 panis, wanem i hapen?
Sam narafala kwestin
- Ridim Eksodas 4:27-31 mo 5:1-23.
?Taem Fero i talem se: ‘Mi mi no bilif long Jeova ya,’ hem i minim wanem? (Eks. 5:2; 1 Saml. 2:12; Rom 1:21)
- Ridim Eksodas 6:1-13, 26-30.
?Long wanem fasin, Ebraham, Aesak, mo Jekob, trifala i no save Jeova? (Eks. 3:13, 14; 6:3; Jen. 12:8, NW)
Nating we Moses i ting se hem i no naf blong mekem wok we Jeova i givim, be Jeova i yusum hem. ?Samting ya i mekem yumi harem olsem wanem? (Eks. 6:12, 30; Luk 21:13-15)
- Ridim Eksodas 7:1-13.
Moses mo Eron i no fraet blong talemaot jajmen blong Jeova long Fero. ?Tufala i soem wanem eksampol long ol man blong God tede? (Eks. 7:2, 3, 6; Wok 4:29-31)
?Olsem wanem Jeova i soem se hem i hae moa long ol god blong Ijip? (Eks. 7:12; 1 Kron. 29:12)
