Stori 34: Wan Niufala Kakae
?YU YU save wanem samting ol man mo woman ya oli stap pikimap long graon? Samting ya i olsem aes. Hem i waet, i tintin mo i sofsof. Be hemia i no aes; hem i wan kakae.
Wan manis finis, ol man Isrel oli aot long Ijip. Naoia oli stap long drae ples. I no gat plante kakae i save gru long ples ya. Ale, ol man oli stat toktok tumas agens long Moses, oli talem se: ‘I moa gud sipos Jeova i kilim mifala i ded long Ijip nomo. Long taem ya, mifala i gat olgeta kakae we mifala i wantem.’
Taswe Jeova i talem se: ‘Bambae mi mi mekem kakae i foldaon long skae, olsem ren.’ Mo Jeova i mekem olsem. Long nekis moning, ol man Isrel oli luk ol waet samting ya i stap olbaot long graon, nao oli asaskem long olgeta se: ‘?Wanem samting ya?’
Moses i talem se: ‘Hemia kakae we Jeova i givim long yufala.’ Ol man oli putum nem blong hem se MANA. Tes blong hem i olsem kek we oli wokem long eg blong sugabag.
Moses i talem long ol man Isrel se: ‘Yufala i mas pikimap kakae we i naf long yufala nomo.’ Ale, evri moning, oli mekem olsem. Nao taem san i kam strong, mana we i stap yet long graon i lus.
Moses i talem bakegen se: ‘Yufala i no mas holem sam mana i stap go kasem nekis dei.’ Be sam man Isrel oli no lesin. ?Yu save wanem i hapen? !Long nekis moning, mana ya i sting mo i gat fulap maget i stap long hem!
Be, i gat wan dei blong wik we Jeova i talem long ol man Isrel blong pikimap naf mana blong tu dei. Hemia long namba sikis dei. Jeova i talem long olgeta blong holem sam mana i stap go kasem nekis dei, from we long namba seven dei, bambae hem i no mekem mana i folfoldaon. !Taem oli holem mana ya i stap go kasem namba seven dei, hem i no sting mo i no gat maget long hem! !Hemia wan merikel bakegen!
Olgeta yia we ol man Isrel oli stap long drae ples, Jeova i givim mana long olgeta blong oli kakae.
Eksodas 16:1-36; Namba 11:7-9; Josua 5:10-12.
Ol Kwestin
- ?Long pija ya, ol man oli stap pikimap wanem? ?Wanem nem blong samting ya?
- ?Wanem tok blong Moses we ol man oli mas folem taem oli pikimap mana?
- ?Jeova i talem se ol man oli mas mekem wanem long namba sikis dei? ?From wanem oli mas mekem olsem?
- ?Wanem merikel we Jeova i mekem long mana ya we oli holem i stap go kasem namba seven dei?
- ?Hamas yia Jeova i stap givim mana long olgeta?
Sam narafala kwestin
- Ridim Eksodas 16:1-36 mo Namba 11:7-9.
?Olsem wanem Eksodas 16:8 i soem se yumi mas respektem ol brata we oli gat spesel wok insaed long Kristin kongregesen? (Hib. 13:17)
?Long drae ples, wanem samting i mekem ol man Isrel oli tingbaot evri dei se oli nidim Jeova tumas? (Eks. 16:14-16, 35; Dut. 8:2, 3)
?Jisas i talem se mana ya i olsem pija blong wanem? ?Olsem wanem yumi kasem blesing from “kakae ya we i kamaot long heven”? (Jon 6:31-35, 40)
- Ridim Josua 5:10-12.
?Ol man Isrel oli kakae mana blong hamas yia? ?Olsem wanem kakae ya i traem olgeta? ?Stori ya i save tijim yumi long wanem samting? (Eks. 16:35; Nam. 11:4-6; 1 Kor. 10:10, 11)
