Stori 37: Haos Tapolen i Ples Blong Mekem Wosip
?YU YU save wanem haos ya? Hemia wan spesel haos tapolen, wan ples blong mekem wosip long Jeova. Narafala nem blong hem se, tabenakel. Wan yia afta we ol man Isrel oli kamaot long Ijip, oli finisim wok blong stanemap haos tapolen ya. ?Yu save hu i gat tingting ya blong wokem haos ya?
Hemia tingting blong Jeova. Taem Moses i stap antap long Hil ya Sinae, Jeova i talem plan blong haos tapolen ya long hem. Hem i talem se oli mas wokem haos ya long wan fasin we i isi blong tekemaot mo karem i go long narafala ples, nao oli save stanemap bakegen long ol defdefren ples we oli go long hem. Ale, taem ol man Isrel oli wokbaot olbaot long drae ples, oli karem haos tapolen ya i go wetem olgeta.
Long smol rum long en blong haos tapolen ya, yu save luk wan bokis. Nem blong bokis ya se, bokis blong kontrak. Long tufala en blong lid blong bokis ya, oli wokem tu enjel, hemia ol jerubim, long gol. Moses i brekem tufala flat ston we God i raetem ol Tenkomanmen long tufala, ale God i wokem tu narafala bakegen. Nao oli putum tufala ston ya insaed long bokis blong kontrak. Oli putum wan botel blong mana insaed long hem tu. ?Yu yu tingbaot yet wanem samting ya mana?
Nao Jeova i jusumaot Eron we i brata blong Moses, blong i kam hae pris. Hem i lidim ol man Isrel long saed blong wosip long Jeova. Mo ol boe blong hem oli pris tu.
Traem luk long bigfala rum blong haos tapolen ya. Rum ya i bigfala moa, i dabolem faswan rum. ?Yu luk wan smol samting we smok i stap kamaot long hem? Hemia olta blong bonem insens long hem. Insens i olsem senta we smel blong hem i gud tumas. Mo tu, i gat wan samting blong putum laet i stanap long hem, we i gat seven han blong hem. Mo namba tri samting long rum ya, hemia wan tebol. Oli putum 12 bred i stap long tebol ya.
Long yad blong haos tapolen ya, i gat wan bigfala besin we i fulap long wota. Ol pris oli yusum wota ya blong swim long hem. I gat wan bigfala olta tu long yad ya. Long ples ya, oli bonem ol anamol we oli kilim finis, blong givim i go long Jeova olsem presen. Haos tapolen ya i stap stret long medel blong ol haos blong ol man Isrel, hemia i min se oli stanemap ol haos tapolen blong olgeta raon long hem.
Eksodas 25:8-40; 26:1-37; 27:1-8; 28:1; 30:1-10, 17-21; 34:1, 2; Hibrus 9:1-5.
Ol Kwestin
- ?Wanem nem blong haos ya we yu luk long pija ya? ?Ol man oli yusum haos ya blong mekem wanem?
- ?From wanem Jeova i talem long Moses blong wokem haos tapolen ya long wan fasin we i isi blong tekemaot?
- ?Wanem bokis i stap long smol rum long en blong haos tapolen? ?Wanem i stap insaed long bokis ya?
- ?Jeova i jusum hu blong kam hae pris? ?Wanem wok we hae pris i mekem?
- ?Wanem trifala samting i stap long bigfala rum blong haos tapolen?
- ?Wanem tufala samting i stap long yad blong haos tapolen? ?Oli yusum tufala samting ya olsem wanem?
Sam narafala kwestin
- Ridim Eksodas 25:8-40; 26:1-37; 27:1-8; mo 28:1.
?Tufala pija blong jerubim long lid blong “Bokis blong Kontrak”, tufala i minim wanem? (Eks. 25:20, 22; Nam. 7:89, NW; 2 King 19:15)
- Ridim Eksodas 30:1-10, 17-21; 34:1, 2; mo Hibrus 9:1-5.
?From wanem Jeova i makemgud se ol pris we oli wok long haos tapolen oli mas klin long bodi blong olgeta? ?Samting ya i mas gat paoa long yumi olsem wanem tede? (Eks. 30:18-21; 40:30, 31; Hib. 10:22)
?Taem aposol Pol i raetem leta i go long ol Hibru Kristin, olsem wanem hem i soemaot se haos tapolen mo kontrak blong Loa tufala i mekem wok blong tufala finis? (Hib. 9:1, 9; 10:1)
