?YU LUK ol flaoa mo ol raef amon we oli gru long wokingstik ya? Hemia wokingstik blong Eron. !Ol flaoa ya mo ol raef frut oli tekem wan naet nomo blong gru! I gud yumi luk olsem wanem samting ya i kamaot.

Longtaem lelebet, ol man Isrel oli stap wokbaot long drae ples. Sam long olgeta oli no ting se i stret we Moses i lidim olgeta mo Eron i mekem wok blong hae pris. Kora i wan long ol man we i tingting olsemia, wetem Datan, Abiram, mo 250 jif blong ol man Isrel. Olgeta ya oli kam luk Moses, mo oli talem se: ‘?From wanem yutufala i putumap yutufala bakegen, se yutufala i hae moa long mifala?’

Moses i talem long Kora mo ol man blong hem se: ‘Tumora long moning, yufala i mas karem ol sensa blong yufala we faea i laet long hem, yufala i mas putum insens long hem nao yufala i mas kam long tabenakel blong Jeova. Bambae yumi luk hu nao Jeova i jusum.’

Long nekis dei, Kora mo ol 250 man blong hem, oli kam long tabenakel. Plante narafala oli kam tu blong sapotem olgeta. Jeova i kros tumas. Moses i talem se: ‘Yufala i go longwe long ol haos tapolen blong ol nogud man ya. Yufala i no tajem olting blong olgeta.’ Ol man oli lesin, mo oli go longwe long ol haos tapolen blong Kora, Datan mo Abiram.

Ale Moses i talem se: ‘Bambae graon i open bigwan mo ol man nogud ya bambae oli foldaon i go long hol ya. Long fasin ya, bambae yufala i save hu nao Jeova i jusumaot.’

Stret afta we Moses i talem samting ya, graon i open bigwan. Haos tapolen blong Kora, mo olting blong hem, wetem Datan, Abiram, mo ol man blong olgeta, oli foldaon i go long hol ya, mo graon i berem olgeta. Taem ol man Isrel oli harem krae blong olgeta, oli singaot se: ‘!Yumi ronwe! !Sipos no, graon ya bambae i berem yumi tu!’

Be Kora wetem ol 250 man blong hem oli stap klosap long tabenakel yet. Nao Jeova i mekem faea i kamaot long skae, i kakae olgeta. Nao Jeova i talem long Eleasara we i pikinini blong Eron, blong tekemaot ol sensa we oli stap long han blong ol dedman ya, hamarem olgeta oli kam flatgud, mo wokem wan brasplet long olgeta blong kavremap olta. Samting ya bambae i stap olsem wan woning long ol man Isrel. Bambae i mekem oli tingbaot we Eron mo ol pikinini blong hem nomo oli gat raet blong mekem wok olsem pris blong Jeova, i no wan narafala man.

Be Jeova i wantem soemaot klia se hem i jusum Eron mo ol pikinini blong hem olsem pris. Taswe hem i talem long Moses se: ‘Yu mas talem long ol jif blong olgeta laen blong Isrel blong oli karem ol wokingstik blong olgeta oli kam long yu. Long laen blong Livae, Eron i mas karem wokingstik blong hem i kam. Ale, yu mas karem olgeta wokingstik ya oli kam long tabenakel, mo yu mas putum olgeta long fored blong bokis blong kontrak. Mo man we mi mi jusumaot hem blong mekem wok blong pris, ol flaoa bambae oli gru long wokingstik blong hem.’

!Long nekis moning, Moses i luk we flaoa mo ol raef amon oli gru long wokingstik blong Eron! ?Taswe, yu save naoia from wanem Jeova i mekem ol flaoa oli gru long wokingstik blong Eron?

Namba 16:1-49; 17:1-11, NW; 26:10.