Stori 49: San i No Muv
YU LUK Josua long pija ya. Hem i stap talem se: ‘!San yu no muv, yu stap wan ples, yu saen long ples ya!’ Nao san i no moa muv. Long wan fuldei, san i stap wan ples long medel blong skae. !Jeova nao i mekem samting ya! Be bambae yumi luk from wanem Josua i wantem se san i saen long ples ya oltaem.
Taem ol faef nogud king blong kantri ya Kenan oli kam blong mekem faet long Gibeon, ol man Gibeon oli sanem toktok i go long Josua se: ‘!Plis, yufala i kam kwik blong givhan long mifala! !Yufala i kam sevem mifala! Ol king antap long hil oli joen wanples finis, mo naoia oli stap mekem faet long mifala, ol slef blong yufala.’
Wantaem nomo, Josua i tekem ol soldia blong hem oli kam. Olgeta oli wokbaot fulnaet gogo, delaet oli kamtru long Gibeon. Taem ol soldia blong ol faef king ya oli luk olgeta, oli fraet mo oli traem ronwe. Be Jeova i mekem ol ston blong aes oli folfoldaon long olgeta olsem ren. Mo ol ston ya oli kilim plante moa man, i winim olgeta we Josua mo ol soldia blong hem oli kilim.
Be Josua i luk we klosap san i godaon. Bambae tudak i kam, mo plante soldia blong ol faef nogud king ya bambae oli ronwe. Taswe, Josua i prea i go long Jeova, nao hem i talem se: ‘!San, yu no muv, yu stap wan ples, yu saen long ples ya!’ Ale san i gohed blong saen, nao ol man Isrel oli winim faet ya.
I gat plante moa nogud king long Kenan we oli no laekem nating ol man blong God. Josua mo ol soldia blong hem oli gohed blong sikis yia blong mekem faet long ol king ya, ale oli winim 31 king long kantri ya. Taem oli winim olgeta finis, Josua i seraot ol graon blong kantri ya Kenan i go long ol laen we oli no gat graon.
Plante yia i pas, nao Josua i ded. Long taem ya, hem i gat 110 yia blong hem. Taem Josua mo ol fren blong hem oli laef i stap, ol man oli obei long Jeova. Be taem ol gudfala man ya oli ded, ol laen blong Isrel oli stat mekem ol samting nogud long fes blong God nao oli kasem trabol from. Long taem ya, oli rili nidim we God i halpem olgeta.
Josua 10:6-15; 12:7-24; 14:1-5; Jajes 2:8-13.
Ol Kwestin
- ?Josua we i stap long pija ya, hem i stap talem wanem? ?From wanem hem i talem olsem?
- ?Jeova i mekem wanem blong halpem Josua mo ol soldia blong hem?
- ?Josua i winim hamas king we oli enemi blong Isrel? ?Hem i mekem ol faet ya blong hamas yia?
- ?From wanem Josua i seraot ol graon blong kantri ya Kenan?
- ?Josua i gat hamas yia taem hem i ded? ?Wanem i hapen long ol man afta we hem i ded?
Sam narafala kwestin
- Ridim Josua 10:6-15.
?Stori ya we Jeova i mekem se san mo mun i no muv blong givhan long Isrel, i givim strong tingting long yumi long saed blong wanem samting tede? (Jos. 10:8, 10, 12, 13; Sam 18:3; Prov. 18:10)
- Ridim Josua 12:7-24.
?Paoa blong hu i winim ol 31 king blong Kenan? ?From wanem samting ya i impoten long yumi tede? (Jos. 12:7; 24:11-13; Dut. 31:8; Luk 21:9, 25-28)
- Ridim Josua 14:1-5.
?Olsem wanem oli seraot ol graon i go long ol laen blong Isrel? ?Samting ya i soemaot wanem long saed blong graon long Paradaes? (Jos. 14:2; Aes. 65:21; Esik. 47:21-23; 1 Kor. 14:33)
- Ridim Jajes 2:8-13.
?Tede hu i mekem wok olsem Josua blong blokem ol man blong apostasi? (Jaj. 2:8, 10, 11; Mat. 24:45-47; 2 Tes. 2:3-6; Taet. 1:7-9; Rev. 1:1; 2:1, 2)
