LONG pija ya, Samuel i stap kafsaedem oel i go long hed blong wan man. Long taem bifo, oli mekem samting ya blong soem se oli jusumaot wan man blong i kam king. Jeova i talem long Samuel blong kafsaedem oel i go long hed blong Sol. Hem i wan spesel oel we smel blong hem i gud.

Sol i ting se hem i no naf blong kam king. Hem i talem long Samuel se: ‘Mi mi laen blong Benjamin ya, mo laen ya blong mifala i smol olgeta long ol laen blong yumi. ?From wanem yu talem long mi se mi nao bambae mi king?’ Jeova i glad long Sol from we Sol i no mekem olsem se hem i wan haeman we i impoten. From samting ya nao, Jeova i jusum Sol blong i kam king.

Be Sol i no wan puaman mo i no smol olgeta. Famle blong hem i rij, mo Sol i wan gudfala yang man. Hem i wan saes man mo i longfala. Ol narafala man Isrel, hed blong olgeta i finis long solda blong hem nomo, mo hem i naes moa long olgeta. Sol i save ron spid tu, mo hem i wan strong man. Ol man oli glad we Jeova i jusumaot Sol blong i kam king. Olgeta ya oli singaot se: ‘!Hurei! !Yu yu king blong mifala! !I gud yu stap longtaem!’

Ol enemi oli stap agensem Isrel yet. Oli stap mekem plante trabol yet long ol man Isrel. I no longtaem afta we Sol i kam king, ol man Amon oli kam mekem faet long ol man Isrel. Sol i singaot plante soldia blong hem, mo hem i winim faet ya agens long ol man Amon. Hemia i mekem ol man oli glad we Sol i king blong olgeta.

Blong plante yia, Sol i lidim ol soldia blong Isrel blong oli winim plante faet. Sol i gat wan pikinini, nem blong hem Jonatan, we hem tu i no save fraet. Jonatan i givhan long Isrel blong winim plante faet. Ol man Filistia oli stap olsem bigfala enemi blong Isrel yet. Wan dei, plante taosen soldia blong Filistia oli kam blong faet agens long ol man Isrel.

Samuel i talem long Sol blong wet long hem, nao bambae hem i kam mekem wan sakrefaes blong givim presen i go long Jeova. Be Samuel i no kamtru kwik. Sol i stap fraet se ol man Filistia bambae oli kam mekem faet long olgeta. Ale hem i no moa wet. Hem i girap i mekem sakrefaes i go long Jeova. Taem Samuel i kamtru, hem i talem long Sol se hem i brekem tok blong God. Hem i se: ‘Jeova bambae i faenem wan narafala man we i stret gud long fes blong hem, blong i kam king blong ol man Isrel.’

Biaen, Sol i brekem tok blong God bakegen. Nao Samuel i talem long hem se: ‘I tru we Jeova i wantem blong yumi kilim ol nambawan sipsip blong mekem sakrefaes long hem, be hem i wantem moa blong yumi obei long tok blong hem. Yu yu no moa wantem obei long tok blong Jeova, mo from samting ya, hem i no moa wantem blong yu yu king blong Isrel.’

Stori ya i lanem yumi long wan bigfala samting. Hem i soem se i impoten we oltaem yumi mas obei long Jeova. Mo tu, hem i soem se wan gudfala man i save jenis i kam nogud, olsem i bin hapen long Sol. Yumi no wantem kam nogud samtaem, ?i tru?

1 Samuel japta 9 kasem 11; 13:5-14; 14:47-52; 15:1-35; 2 Samuel 1:23.