?YU SAVE wanem samting smol gel ya i stap talem? Hem i stap talem long woman ya se i gat wan profet blong Jeova we nem blong hem Elisa, mo i stap tokbaot ol bigbigfala merikel we Jeova i givhan long Elisa blong mekem. Woman ya i no save long Jeova from we hem i no wan woman Isrel. Bambae yumi luk from wanem gel ya i stap long haos blong woman ya.

Woman ya i blong Siria. Man blong hem, Neman, hem i komanda blong ami blong Siria. Wan taem, ol soldia blong Siria oli go mekem faet long Isrel, nao oli karembak smol gel ya mo oli givim hem i go long woman blong Neman blong i wok blong hem.

Neman i gat wan rabis sik blong skin we i stap spolem bodi blong hem. Sik ya leprosi i mekem se mit blong bodi blong man i kam roten mo i foldaon. Gel ya i stap talem long woman blong Neman se: ‘Misis, mi mi wantem tumas sipos masta i save go luk profet blong Jeova we i stap long Isrel. Man ya bambae i save tekemaot sik ya, i mekem hem i kamgud bakegen.’ Biaen, woman ya i talemaot tok blong smol gel ya long man blong hem.

Neman i wantem tumas blong kamgud long bodi blong hem; ale hem i go long Isrel. Taem hem i kasem Isrel, hem i go long haos blong Elisa. Elisa i talem long man blong wok blong hem, blong i go talem long Neman se i mas swim seven taem long Jodan Reva. Be taem Neman i harem tok ya, hem i kros we i kros, i talem se: ‘!Ol reva long ples blong mi oli gud moa i winim reva ya long Isrel!’ Nao Neman i gowe.

Be wan man blong wok blong hem i talem long hem se: ‘Masta, sipos Elisa i talem long yu blong yu mekem wan strong samting, bambae yu save mekem, be samting ya we hem i talem i isi nomo. ?From wanem yu no save go swim olsem we hem i talem, blong bodi blong yu i kamgud bakegen?’ Ale Neman i lesin long man blong wok blong hem. Hem i godaon long Jodan Reva, i draonem hem seven taem long wota. !Nao sik blong hem i finis olgeta, bodi blong hem i kamgud bakegen!

Neman i glad we i glad, nao hem i gobak long Elisa, i talem long hem se: ‘Naoia mi mi savegud we i no gat narafala god we i tru. God ya blong yufala ol laen blong Isrel, hem nomo i God. Plis, mi wantem yu yu tekem smol presen ya blong mi.’ Be Elisa i talem se: ‘Mi mi no save tekem wan presen nating long yu.’ Elisa i save se i no stret blong tekem presen ya, from we i no hem we i mekem Neman i kamgud, Jeova nomo i mekem wok ya. Be Gehasi, man blong wok blong Elisa, hem i wantem presen ya blong hem wan.

Ale Gehasi i mekem olsem: Afta we Neman i aot, Gehasi i resis biaen long hem. Taem hem i kasem Neman, hem i talem long hem se: ‘Elisa i sanem mi blong mi talem long yu se naoia nomo, sam fren blong hem oli kamtru, mo hem i wantem blong yu givim wan smol presen long olgeta.’ Be Gehasi i stap giaman. Neman i no save se hem i stap giaman; ale hem i givim sam samting long hem.

Taem Gehasi i kasem haos, Elisa i save finis samting we hem i bin mekem. Jeova i mekem Elisa i save long samting ya. Nao Elisa i talem long hem se: ‘From we yu mekem nogud fasin ya, bambae sik blong Neman i kasem yu.’ !Mo wantaem nomo, sik ya i kasem hem!

?Stori ya i tijim yumi long wanem samting? Faswan samting se, yumi mas mekem olsem smol gel ya, yumi mas tokbaot Jeova oltaem. Ol tok ya oli save givhan bigwan long narafala. Seken samting se, yumi no mas gat flas tingting olsem Neman i gat fastaem, be yumi mas obei long ol man blong God. Mo namba tri samting se, yumi no mas giaman olsem Gehasi. Yes, yumi lanem plante samting taem yumi ridim Baebol.

2 King 5:1-27.