Stori 70: Jona Mo Bigfala Fis Ya
TRAEM lukluk man we i stap long solwota ya. Hem i fesem wan bigfala trabol. !Fis ya i rere blong swolemdaon hem! ?Yu yu save man ya? Nem blong hem Jona. Bambae yumi luk from wanem trabol ya i kasem hem.
Jona i wan profet blong Jeova. Afta we profet Elisa i ded, Jeova i talem long Jona se: ‘Yu girap, yu go long bigfala taon ya Nineve, yu tok long ol man long ples ya, from we mi luk se fasin blong olgeta i nogud we i nogud.’
![Jona mo bigfala fis ya](https://assetsnffrgf-a.akamaihd.net/assets/l/my/my_LM/70.jpg)
Be Jona i no wantem, ale hem i go faenem wan sip we i rere blong aot blong go long narafala kantri. Jeova i no glad we Jona i ronwe. Ale hem i mekem wan bigfala win i blu, i mekem solwota i raf we i raf we klosap sip ya i brok. Ol boskru oli fraet tumas, mo olgeta evriwan oli stap prea long ol god blong olgeta blong oli givhan long olgeta.
Nao Jona i talem long olgeta se: ‘Jeova we i mekem heven mo wol, hem i God blong mi. Mi mi man blong hem, be mi stap ronwe long wok we hem i givim long mi.’ Nao ol boskru oli askem se: ‘?Bambae mifala i mekem olsem wanem long yu blong win ya i godaon, mo solwota i kwaet?’
Jona i talem se: ‘Yufala i sakem mi mi go long solwota, nao bambae solwota i kwaet.’ Ol boskru oli no wantem mekem olsem, be si i kam bigwan tumas, mo win i stap kam strong moa. Ale oli karem Jona, oli sakem hem i go long solwota, nao wantaem nomo, solwota i kwaet.
Taem Jona i stap draon long solwota, wan bigfala fis i swolemdaon hem. Be Jona i no ded. Hem i stap long bel blong fis ya blong tri dei mo tri naet. Jona i sore tumas we hem i no bin lesin long Jeova mo go long Nineve. ?Ale yu save wanem samting Jona i mekem?
Hem i prea long Jeova, i askem long hem blong i halpem hem. Nao Jeova i tok long fis ya, mo fis ya i gosoa, i traot, nao wantaem nomo Jona i kamaot i foldaon long sanbij. Afta long samting ya, Jona i girap i go long Nineve. ?Stori ya i tijim yumi long wanem samting? I impoten tumas blong mekem olgeta samting we Jeova i talem long yumi blong mekem.
Buk blong Jona long Baebol.
Ol Kwestin
- ?Jona hem i hu? ?Jeova i talem long hem blong mekem wanem?
- ?Jona i no wantem go long ples we Jeova i talem long hem, ale hem i girap i mekem wanem?
- ?Blong mekem win i godaon, Jona i talem long ol boskru blong oli mekem wanem?
- ?Folem samting we yu luk long pija ya, wanem i hapen taem Jona i stap draon long solwota?
- ?Jona i stap blong hamas dei insaed long bel blong bigfala fis ya? ?Taem Jona i stap long ples ya, hem i mekem wanem?
- ?Afta we Jona i kamaot long bel blong fis ya, hem i go wea? ?Stori ya i tijim yumi long wanem samting?
Sam narafala kwestin
- Ridim Jona 1:1-17.
?I klia se Jona i gat wanem tingting long saed blong wok we God i givim long hem blong prij long ol man Nineve? (Jona 1:2, 3; Prov. 3:7; Pri. 8:12, NW)
- Ridim Jona 2:1, 2, 10.
?Olsem wanem stori blong Jona ya i mekem tingting blong yumi i strong se Jeova bambae i ansa long ol prea blong yumi? (Sam 22:24; 34:6; 1 Jon 5:14)
- Ridim Jona 3:1-10.
Jeova i gohed blong yusum Jona nating se Jona i no wantem mekem faswan wok we Jeova i givim long hem. ?Olsem wanem samting ya i save leftemap tingting blong yumi? (Sam 103:14; 1 Pita 5:10)
?Samting we i hapen taem Jona i prij long ol man Nineve, i tijim yumi long wanem samting long saed blong fasin blong jajem ol man we yumi prij long olgeta? (Jona 3:6-9; Pri. 11:6; Wok 13:48)