Stori 73: Laswan Gudfala King Blong Isrel
JOSAEA i kam king blong tufala laen blong Isrel long saot. Hem i gat eit yia blong hem nomo. From we hem i smol tumas, sam olfala oli givhan long hem blong i rul long nesen ya.
Josaea i rul blong seven yia nao hem i stat blong lukaot Jeova. Hem i folem fasin blong ol gudfala king olsem Deved, Jehosafat mo Hesekia. Taem Josaea i kam bigwan lelebet, hem i mekem wan samting we i soem strong tingting blong hem.
Longtaem finis i kam, bighaf blong ol man Isrel oli mekem ol nogud fasin. Oli mekem wosip long ol giaman god. Oli bodaon long ol aedol. Taswe, Josaea i tekem ol man blong hem, ale oli go spolem olgeta giaman wosip long kantri ya. Hemia wan bigfala wok, from we plante man oli stap mekem wosip long ol giaman god. Long pija ya, yu save luk Josaea mo ol man blong hem we oli stap smasem ol aedol.
Afta, Josaea i jusumaot tri man, blong trifala i lukaot long wok blong mekem gud haos blong Jeova bakegen. Ol man oli saksakem mane, mo trifala man ya oli yusum mane ya blong pem ol samting we oli nidim blong mekem wok long haos blong God. Taem oli stap wokem haos ya, hae pris Hilkia i faenem wan samting we i impoten tumas. Hemia buk blong loa we Jeova i talem long Moses blong raetem longlongtaem bifo. Buk ya i lus blong plante plante yia.
Oli karem buk ya i go long Josaea, mo hem i askem wan man blong i ridim buk ya long hem. Josaea i lesingud, nao from ol tok we hem i harem, hem i luksave se ol man oli no stap folem loa blong Jeova. Hem i harem nogud, ale hem i terem klos blong hem olsem yu luk long pija ya. Hem i se: ‘Jeova i kros tumas long yumi from we ol bubu blong yumi oli no bin folem ol samting we buk ya i talem.’
Josaea i talem long hae pris Hilkia blong faenemaot wanem we Jeova bambae i mekem long olgeta. Nao Hilkia i go luk wan woman profet we nem blong hem Hulda, blong woman ya i talem tok blong God long hem. Hilkia i karem tok ya blong Jeova i gobak long Josaea: ‘Jerusalem mo olgeta man long taon ya bambae oli kasem panis, from we oli stap mekem wosip long ol giaman god nao kantri i kam fulap long ol nogud fasin. Be from we yu Josaea yu mekem samting we i gud, panis ya bambae i no kamtru long taem we yu yu stap. Bambae i kamtru afta we yu yu ded.’
2 Kronikel 34:1-28.
Ol Kwestin
- ?Taem Josaea i kam king hem i hat hamas yia? ?Afta we Josaea i rul blong seven yia, hem i stat mekem wanem?
- ?Long faswan pija, Josaea i stap mekem wanem?
- Hae pris i faenem wanem samting taem oli stap mekem gud haos blong God bakegen?
- ?From wanem Josaea i terem klos blong hem?
- ?Wanem tok we God i givim long woman profet ya Hulda blong talem long Josaea?
Sam narafala kwestin
- Ridim 2 Kronikel 34:1-28.
?Wanem gudfala eksampol we Josaea i soemaot long ol man we maet papa mama blong olgeta i no bin tijim olgeta long ol gudfala fasin? (2 Kron. 33:21-25; 34:1, 2; Sam 27:10)
?Josaea i mekem wanem blong givhan long trufala wosip, long namba 8 yia, namba 12 yia, mo namba 18 yia blong rul blong hem? (2 Kron. 34:3, 8)
?Wanem samting we yumi save lanem from eksampol blong King Josaea mo Hae Pris Hilkia we i save halpem yumi blong mekem haos wosip blong yumi i stapgud oltaem? (2 Kron. 34:9-13; Prov. 11:14; 1 Kor. 10:31)
