NAOIA, 10 yia i pas finis stat long taem we king Nebukadnesa i karem ol man Isrel we oli skulgud oli go long Babilon. !Traem luk wanem i stap hapen! Jerusalem i stap bon long faea. Mo ol man Isrel we oli no ded, ol soldia oli stap karem olgeta oli go kalabus long Babilon.

Yu tingbaot yet, we ol profet blong Jeova oli bin givim woning se hemia nao samting we bambae i hapen sipos ol man Isrel oli no lego ol nogud fasin blong olgeta. Oli no lesin long ol profet ya. Oli no moa mekem wosip long Jeova, be oli gohed nomo blong wosipim ol giaman god. Taswe, i stret nomo we oli kasem panis ya. Yumi save ol samting ya from we profet Esikel i talemaot ol nogud samting we ol man Isrel oli mekem.

?Hu ya Esikel? Hem i wan long ol yangfala we King Nebukadnesa i bin tekem olgeta oli go long Babilon bitim 10 yia bifo we ol ami oli spolem Jerusalem. Long semtaem ya, oli tekem Daniel i go tu, wetem trifala fren blong hem Sadrak, Mesak, mo Abednego.

Taem Esikel i stap yet long Babilon, Jeova i soemaot long hem ol nogud samting we i stap hapen long haos blong Hem long Jerusalem. Jeova i mekem wan merikel blong soem samting ya long hem. Esikel i stap long Babilon, be Jeova i mekem se hem i luk wan vison blong ol samting we i stap hapen long haos blong Hem long Jerusalem. !Esikel i sek long ol samting we hem i luk!

Jeova i talem long Esikel se: ‘?Yu luk ol samting ya we ol man ya oli stap mekem? Oli stap mekem ol samting we i nogud we i nogud. Olgeta ya oli droem ol pija olbaot long ol wol blong haos blong mi. I gat ol pija blong ol snek, mo ol anamol we oli doti long fes blong mi. !Mo oli stap mekem wosip long ol pija ya!’ Esikel i luk ol samting ya, mo i raetemdaon.

Jeova i askem long Esikel se: ‘?Yu luk samting ya we ol lida blong Isrel oli stap mekem long haed?’ Yes, Esikel i luk. I gat seventi man we oli stap bodaon long ol giaman god. Oli stap talem se: ‘Jeova i no luk yumi ya. Hem i lego kantri blong yumi finis ya.’

Nao Jeova i tekem Esikel i go long doa blong bigfala yad blong haos blong hem long saed i go long not, mo hem i luk ol woman we oli stap bodaon long giaman god ya Tamus. Esikel i luk 25 man tu, we oli stap stanap klosap long doa blong haos blong Jeova. !Oli stap lukluk i go long is, oli bodaon, oli stap mekem wosip long san we i stap kam antap!

Jeova i talem se: ‘Ol man ya oli tanem baksaed long mi, oli no gat respek nating. Oli mekem ol nogud fasin, be oli go moa yet, oli mekem ol fasin ya insaed long haos blong mi.’ Ale Jeova i talem se bambae i panisim olgeta, i se: ‘Bambae oli luk paoa blong kros blong mi, bambae mi no save sevem laef blong olgeta, mo mi no save gat sore long olgeta nating.’

Samwe long tri yia afta we Jeova i soemaot ol samting ya long Esikel, ol man Isrel oli girap agensem King Nebukadnesa. Nao king wetem ol ami blong hem oli go blong mekem faet long olgeta. Afta we faet i gohed blong wan yia haf, ol ami blong Babilon oli brekem stonwol we i goraon long Jerusalem, mo oli bonem taon ya long faea. Oli kilim i ded bighaf blong ol man long ples ya. Long olgeta we oli no ded, oli karem plante oli go kalabus long Babilon.

?From wanem Jeova i letem bigfala panis ya i kam long ol man Isrel? From we oli no lesin long hem mo oli no obei long ol loa blong hem. Samting ya i soem se oltaem yumi mas mekem samting we God i talem long yumi.

King Nebukadnesa i letem samfala oli stap long kantri blong Isrel. Mo hem i putum wan man Jiu we nem blong hem Gedalia, blong i stap olsem distrikejen blong olgeta ya. Be sam man Isrel oli girap oli kilim Gedalia i ded. Nao olgeta man oli fraet long ol man Babilon, se bambae oli kam kilim olgeta i ded from samting ya we oli mekem. Ale oli fosem Jeremaea blong kam wetem olgeta, nao oli girap oli ronwe i go long Ijip.

Naoia i no moa gat man nating long kantri blong Isrel. Blong 70 yia, ples i emti nomo i stap, i no gat man long hem. Be Jeova i mekem promes se afta we 70 yia i pas, bambae hem i karem ol man blong hem oli kambak long ples blong olgeta. ?Be wanem i stap hapen long ol man blong God we ol ami oli karem olgeta oli go long Babilon? Bambae yumi luk.

2 King 25:1-26; Jeremaea 29:10; Esikel 1:1-3; 8:1-18.