Taem ol man Isrel oli stap kalabus long Babilon, plante samting oli hapen blong traem bilif blong olgeta. Ol man oli sakem Sadrak, Mesak, mo Abednego i go long wan bigfala faea, be God i sevem trifala ya. Afta we ol ami blong Media mo Pesia oli winim Babilon, ol man oli sakem Daniel i go long wan hol we i fulap long ol laeon, be God i sevem hem tu, i satem maot blong ol laeon ya.

Biaen, Sirus we i king blong Pesia, i letem ol man Isrel oli gofri. Seventi yia afta we oli kam slef long Babilon, oli gobak long ples blong olgeta, Jerusalem, mo oli stat blong bildim haos blong Jeova. Be, i no longtaem, ol enemi oli blokem wok ya. Taswe, oli jes finisim haos blong God samwe long 22 yia afta we oli kambak long Jerusalem.

Bambae yumi ridim stori blong trip blong Esra, we i kambak long Jerusalem blong mekem haos blong God i naes bakegen. Hemia 47 yia afta we oli finisim wok blong bildim haos ya. Totin yia afta long trip ya blong Esra, Nehemaea i givhan blong bildim bakegen stonwol blong Jerusalem we i brobrok. Haf FAEF i tokbaot 152 yia blong histri kam kasem taem we Nehemaea i bildim stonwol ya bakegen.