?WANEM i stap hapen long pija ya? Ol man oli stap mekem wan bigfala lafet. King blong Babilon i singaot wan taosen haeman blong oli kam joen long lafet ya. Oli stap dring long ol kap we oli wokem long gol mo silva, we oli bin karemaot long haos blong Jeova long Jerusalem. Be, wantaem nomo, oli sek se han blong wan man i stap raet long wol. Evriwan oli seksek bigwan.

Belsasa we i smol bubu blong Nebukadnesa, hem nao i king. Taem hanraet ya i kamaot, hem i singaot ol waes man blong hem oli kam. Nao hem i talem long olgeta se: ‘Man we i save ridim tok ya, mo i talemaot mining blong hem long mi, bambae mi givim plante samting long hem, mo bambae mi putumap hem i kam olsem namba tri king long kingdom blong mi.’ Be i no gat wan long ol waes man ya we i naf blong ridim ol hanraet long wol mo talem mining blong hem.

Mama blong king i harem noes we olgeta oli stap mekem, nao hem i kam insaed long bigfala rum we oli stap mekem lafet long hem. Hem i talem long king se: ‘Yu no fraet. I gat wan man long kingdom ya blong yu we i gat spirit blong ol tabu god i stap long hem. Taem bubu blong yu Nebukadnesa i stap king yet, hem i putumap man ya i kam hed blong olgeta waes man blong hem. Man ya, nem blong hem Daniel. I gud yu singaot hem i kam, nao bambae hem i talemaot mining blong samting ya long yu.’

Wantaem nomo, king i talem long ol man blong hem blong singaot Daniel i kam. Daniel i no wantem ol presen we king i talem se bambae i givim long hem. Hem i talem long king from wanem Jeova i bin tekemaot paoa blong rul long Nebukadnesa we i olfala bubu blong Belsasa. Daniel i talem se: ‘Hem i flas tumas, nao Jeova i panisim hem.’

Nao Daniel i talem long Belsasa se: ‘Yu yu savegud samting ya, be yu stap flas olsem Nebukadnesa nomo, yu no mekem tingting blong yu i kamdaon nating. Yu karemaot ol kap mo ol besin ya long haos blong Jeova, nao yufala i stap yusum olgeta blong dring waen. Yu stap presem ol god ya we yufala i wokem long wud mo ston. Be God ya we i Wokem yumi, yu no ona long hem nating. From samting ya nao, hem i raetem ol tok ya.’

Daniel i talem se: ‘Hemia toktok we yu luk, MENE, MENE, TEKEL mo PARSIN.’

‘Hemia mining blong hem. MENE, i min se God i makem ol dei blong yu we yu yu king, mo naoia, taem blong yu i finis finis. TEKEL, i min se hem i skelem yu finis long skel, mo i luk se yu yu nogud nating. PARSIN, i min se kingdom blong yu i seraot finis, i go long ol man Media mo ol man Pesia.’

Taem Daniel i stap toktok yet, ol man Media mo Pesia oli kam insaed long Babilon. Oli winim taon ya mo oli kilim Belsasa i ded. !Long naet ya nomo, ol hanraet long wol i kamtru! ?Be wanem i hapen long ol man Isrel biaen? Bambae yumi faenemaot, be fastaem bambae yumi luk wanem i hapen long Daniel.

Daniel 5:1-31.