?YU YU luk bigfala sta we ol man ya oli stap poenem? Taem oli aot long Jerusalem, sta ya i saen. Ol man ya oli kam long Is, mo oli man blong lukluk ol sta. Oli ting se niufala sta ya i stap lidim olgeta oli go long wan man we i impoten.

Taem ol man ya oli kamtru long Jerusalem, oli askem long ol man se: ‘?Pikinini ya we i jes bon, we bambae i king blong ol man Jiu, hem i stap wea?’ “Ol man Jiu” i wan narafala tok blong talem ol man Isrel. Oli talem se: ‘Mifala i luk sta blong hem long Is, nao mifala i kam blong wosipim hem.’

Herod we i king blong Jerusalem i harem nius ya, nao hem i kros. Hem i no wantem se wan narafala king i tekem ples blong hem. Ale hem i singaot ol jif pris oli kam, nao i askem long olgeta se: ‘?Bambae king ya i bon long weples?’ Oli ansa se: ‘Baebol i talem se bambae hem i bon long taon ya Betlehem.’

Nao Herod i singaot ol man we oli kam long Is blong oli kam long fes blong hem, nao i talem long olgeta se: ‘Yufala i mas go lukaot pikinini ya, mo taem yufala i faenem hem, yufala i mas sanem tok i kam long mi, blong mi tu bambae mi go wosipim hem.’ Be Herod i no wantem wosipim pikinini ya. !Hem i wantem kilim pikinini ya i ded!

Sta ya i go fastaem long olgeta gogo i kasem Betlehem, nao i stop stret antap long haos we pikinini ya i stap slip long hem. Oli go insaed long haos ya, nao oli luk pikinini ya Jisas wetem mama blong hem Meri. Oli openem ol basket blong olgeta, mo oli tekemaot ol presen blong givim long Jisas. Be biaen, God i toktok long olgeta long wan drim, i blokem olgeta blong oli no gobak long King Herod. Ale, oli folem wan narafala rod blong gobak long kantri blong olgeta.

Taem King Herod i save we ol man ya blong Is oli gohom finis, hem i kros tumas. Nao hem i girap, i talem long ol soldia blong hem blong oli go long Betlehem blong lukaot olgeta pikinini we oli boe, we yia blong olgeta i no bitim tu yia yet, blong oli kilim olgeta evriwan i ded. Be bifo long taem ya, Jeova i toktok long Josef long wan drim, i givim woning long hem long saed blong plan ya blong Herod. Nao Josef i girap i tekem Meri mo Jisas, trifala i go long Ijip. Mo oli stap long kantri ya gogo King Herod i ded. Taem trifala i harem nius se king ya i ded, trifala i gobak long Nasaret. Hemia nao ples we Jisas i gruap long hem.

?Hu i mekem niufala sta ya i saen? Tingbaot se, taem ol man ya oli luk sta ya, oli go long Jerusalem fastaem. Setan i wantem kilim Pikinini blong God i ded, mo hem i save se King Herod long Jerusalem bambae i traem kilim hem i ded. Ale Setan nao i mekem sta ya i saen.

Matiu 2:1-23; Maeka 5:2.