GEL we yu luk long pija ya, hem i gat 12 yia blong hem. Jisas i stap holem han blong gel ya, mo mama papa blong hem, tufala i stap stanap klosap. ?Yu save from wanem tufala i glad? Bambae yumi luk.

Papa blong gel ya, hem i wan impoten man we nem blong hem Jaeras. Wan dei, gel blong Jaeras i sik, mo hem i go slip long bed. Be hem i no kamgud. Sik blong hem i kam moa strong. Jaeras mo woman blong hem, tufala i wari tumas, from we i luk olsem se smol gel ya bambae i ded. Hem i wan gel nomo we tufala i gat. Ale Jaeras i go lukaot Jisas. Hem i harem plante man oli tokbaot ol merikel we Jisas i stap mekem.

Taem Jaeras i faenem Jisas, ol man oli fulap raon long hem. Be Jaeras i puspusum ol man ya, blong hem i save pastru long bigfala hip blong olgeta, nao hem i nildaon long fored blong Jisas mo i krae long hem. Hem i se: ‘Gel blong mi i sik tumas. Plis yu kam mekem hem i gud bakegen.’ Ale Jisas i talem se bambae hem i kam.

Taem oli stap wokbaot i go, plante man oli stap puspusum olgeta blong oli traem kam klosap long Jisas. Wantaem nomo, Jisas i stop mo i talem se: ‘?Ei, hu i tajem mi?’ Jisas i haremsave se paoa i goaot long hem, taswe hem i save se wan man i tajem hem. ?Be hu i tajem hem? Hem i wan woman we sik blong hem i stap long hem 12 yia finis. !Hem i kam tajem klos blong Jisas, nao sik blong hem i kamgud!

Jaeras i haremgud nao, from we hem i luk se i isi nomo blong Jisas i mekem sikman i kamgud bakegen. Be stret long taem ya, wan man blong karem mesej i kamtru, i talem long Jaeras se: ‘Smol gel blong yu i lus finis. I gud yu talem long Jisas blong hem i no moa kam.’ Jisas i harem tok blong man ya, nao i talem long Jaeras se: ‘Yu no harem nogud. Gel blong yu bambae i oraet.’

Taem oli kamtru long haos blong Jaeras, olgeta man oli stap krae we oli krae bigwan from gel ya. Be Jisas i talem se: ‘Yufala i no krae. Gel ya i no ded ya. Hem i stap slip nomo.’ Nao olgeta oli stap laf long Jisas, from we oli savegud se hem i ded finis.

Nao Jisas i tekem tri aposol blong hem, wetem papa mo mama blong gel ya, olgeta ya nomo oli biaen long hem, oli go insaed. Nao Jisas i holem han blong gel ya, i singaot se: ‘!Smol gel! !Yu stanap!’ Nao gel ya i laef bakegen, olsem pija ya i soem. !Wantaem nomo, hem i stanap mo i wokbaot! Hemia nao from wanem mama papa blong hem i glad we i glad.

Hemia i no fas dedman we Jisas i mekem hem i laef bakegen. Baebol i talem se fastaem finis, hem i mekem boe blong wan wido woman i laef bakegen long taon blong Naen. Biaen, Jisas i mekem Lasaros we i brata blong Meri mo Mata, i laef bakegen. Taem Jisas i rul olsem king we God i putumap, bambae hem i mekem plante moa man oli laef bakegen. ?Yu yu glad long samting ya?

Luk 8:40-56; 7:11-17; Jon 11:17-44.