?YU LUK enjel long pija ya? Hem i stap openem doa blong kalabus. Ol man we oli stap gofri, hemia ol aposol blong Jisas. Bambae yumi luk from wanem oli stap long kalabus.

Smoltaem bifo, tabu spirit i bin kamdaon long ol disaepol blong Jisas. Nao wan dei, long aftenun, Pita mo Jon tufala i stap go long haos blong God long Jerusalem. Klosap long doa blong haos blong God, wan man i stap sidaon. Taem man ya i bon, leg blong hem i nogud finis. Evri dei, ol man oli karem hem i kam long ples ya, mo hem i stap asaskem mane long ol man we oli stap go long haos blong God. Taem man ya i luk Pita mo Jon, hem i askem mane long tufala. ?Tufala aposol ya i mekem wanem?

Tufala i stop, tufala i lukluk man ya, tufala i sore long hem. Nao Pita i talem long hem se: ‘Mi mi no gat mane nating, be wan samting we mi mi gat, bambae mi givim long yu. Long nem blong Jisas, mi mi talem long yu. !Yu girap, yu wokbaot!’ Pita i holem raet han blong man ya, nao wantaem nomo, hem i stanap, i wokbaot. Taem ol man oli luk nambawan merikel ya, oli sapraes mo oli glad tu.

Pita i talem se: ‘Paoa blong God we i mekem Jisas i laef bakegen, hem nao i givhan long mitufala blong mekem merikel ya.’ Taem Pita mo Jon tufala i stap toktok yet, sam lida blong skul oli kam. Olgeta ya oli kros tumas from we Pita mo Jon tufala i stap talem long ol man se Jisas i laef bakegen. Ale, oli holem tufala, oli sakem tufala i go long kalabus.

Long nekis dei, ol lida blong skul oli mekem wan bigfala miting. Oli tekem Pita mo Jon mo man we fastaem leg blong hem i nogud, trifala i kam stanap long fes blong olgeta. Nao oli askem long Pita mo Jon se: ‘?Yutufala i yusum wanem paoa blong mekem merikel ya?’

Pita i talem se paoa blong God we i mekem Jisas i laef bakegen, hem nao i givhan long tufala blong mekem leg blong man ya i gud bakegen. Ol pris oli no save talem wan samting, from we oli luk se leg blong man ya i kam gud finis. Ale, oli givim woning long ol aposol se oli no moa talemaot Jisas. Nao oli letem olgeta oli gofri.

Be ol aposol oli gohed evri dei blong talemaot Jisas mo blong mekem ol sikman oli gud bakegen. Ol man long evri ples oli harem nius blong ol merikel ya. Fulap man long ol taon raonabaot long Jerusalem, olgeta tu oli karem ol sikman blong olgeta oli kam, nao ol aposol oli mekem olgeta oli gud bakegen. From samting ya, ol lida blong skul oli jalus, nao oli holem ol aposol mo putum olgeta long kalabus. Be ol aposol oli no stap longtaem long kalabus.

Long naet, wan enjel blong God i openem doa blong kalabus, olsem pija ya i soem. Enjel ya i talem se: ‘Yufala i go long haos blong God, yufala i gohed blong talemaot tok blong God long ol man.’ Long nekis moning, ol lida blong skul oli sanem sam man oli go long kalabus blong karem ol aposol oli kam long olgeta, be ol aposol oli no moa stap long kalabus. Biaen, ol man ya oli faenem ol aposol long haos blong God, oli stap tijim ol man long ples ya. Ale, oli tekem olgeta oli go long haos we kaonsel ya Sanhedrin i stap miting long hem.

Ol lida blong skul oli talem se: ‘Mifala i tok strong long yufala finis, se bambae yufala i no moa yusum nem blong Jisas blong tijim ol man. Be naoia, Jerusalem i fulap finis long ol tok blong yufala.’ Ol aposol oli ansa se: ‘Mifala i mas obei long God, mifala i no save obei long man.’ Ale, oli gohed nomo blong tijim ol man long saed blong “gud nius.” Ol aposol oli soem wan nambawan eksampol we yumi save folem.

Ol Wok japta 3 kasem 5.