Stori 112: Sip i Rek Klosap Long Wan Aelan
!YU LUK! !Sip ya i stap long trabol! !Hem i stap brobrok! ?Yu luk ol man we oli jamaot long sip ya, oli stap swimso? Samfala oli kasem so finis. Hemia Pol long medel blong pija ya. Bambae yumi luk wanem i bin hapen long hem.
Ating yu rimemba se, Pol i stap kalabus tu yia long Sisaria. Nao oli putum hem long wan sip wetem sam narafala prisena, blong oli go long Rom. Taem sip i pas long aelan blong Krit, wan bigfala win i girap. Win ya i strong we i strong olsem hariken, nao ol boskru oli no moa save stiarem sip ya. Long dei, oli no save luk san, mo long naet, oli no save luk ol sta. Afta we plante dei i pas, ol man ya oli ting se bambae oli mas ded.
Nao Pol i stanap long fes blong olgeta, i talem se: ‘Bambae i no gat wan long yumi we i save lusum laef blong hem; sip ya nomo bambae i lus. Las naet, wan enjel blong God i kamtru long mi, i talem se: “Pol, yu no fraet. Bambae yu yu mas go stanap long fes blong Sisa, long Rom. Mo God bambae i sevem ol man ya we oli stap wetem yu long sip.” ’
Long namba 14 dei afta we hariken ya i stat, klosap long medel naet, ol boskru oli ting se oli stap kam klosap long so samples. Oli fraet se sip ya bambae i brok long ol ston, ale oli sakem angka. Long nekis moning, oli luk wan pasis we i gat sanbij long hem. Mo oli ting se sipos oli save mekem, bambae oli putum sip i goso long ples ya.
Be i gat wan ples we solwota i no dip, nao sip i fas long sanbij, i no moa save muf. Ol bigbigfala wef oli brekemaot ol timba blong hem. Kapten blong ol soldia we oli gad long Pol olgeta, i talem se: ‘Yufala we i save swim, yufala i jamdaon, yufala i swimso. Ol narafala man, yufala i holem sam plang, no sam pis blong sip we solwota i brekemaot finis, nao yufala i swim i kam biaen.’ Ale, oli mekem olsem. Mo long fasin ya, ol 276 man long sip ya oli kasem sanbij, i no gat wan i lus, olsem enjel i bin promes.
Nem blong aelan ya, hemia Molta. Ol man long ples ya oli mekem i gud tumas long olgeta. Taem win i godaon mo solwota i kwaet, oli putum Pol long wan narafala sip, we i karem hem i go long Rom.
Ol Wok 27:1-44; 28:1-14.
Ol Kwestin
- ?Wanem i hapen long sip we Pol i stap long hem taem i pas long aelan blong Krit?
- ?Pol i talem wanem long ol man long sip?
- ?Wanem i hapen blong mekem se sip ya i brobrok?
- ?Kapten blong ol soldia we i stap long sip ya i talem long ol man blong oli mekem wanem? ?Hamas man oli kasem sanbij?
- ?Wanem nem blong aelan ya we oli goso long hem? ?Taem win i godaon, oli mekem wanem long Pol?
Sam narafala kwestin
- Ridim Ol Wok 27:1-44.
?From wanem yumi save gat strong tingting se Baebol i tru taem yumi ridim stori ya blong trip blong Pol we i go long Rom? (Wok 27:16-19, 27-32; Luk 1:3; 2 Tim. 3:16, 17)
- Ridim Ol Wok 28:1-14.
Ol hiten man blong Molta oli sore long aposol Pol mo ol fren blong hem long sip nao ‘oli mekem i gud tumas long olgeta.’ ?Ale, ol Kristin oli mas wantem soem wanem? ?Oli mas soem fasin ya long wanem rod? (Wok 28:1, 2; Hib. 13:1, 2; 1 Pita 4:9)
