Stori 114: Rabis Fasin Bambae i Finis
?YU YU luk wanem samting long pija ya? Yes, yu luk plante waet hos. ?Oli stap kamaot long weples? !Oli kamdaon long ol klaod long heven! ?Be i gat ol trufala hos long heven?
Nogat, ol hos ya oli no trufala hos. Yumi save samting ya from we ol hos oli no save ron antap long ol klaod. Be Baebol i talem se i gat sam hos long heven. ?From wanem Baebol i talem olsem?
From we, long taem bifo, ol man oli yusum ol hos long ol faet. Taswe, taem Baebol i tokbaot ol man we oli aot long heven long hos, oli kamdaon, hem i stap soemaot se God bambae i mekem faet agensem ol man long wol ya. ?Yu save nem blong faet ya we bambae i kamaot? Amagedon. Faet ya bambae i finisim ol rabis fasin blong wol ya.
Jisas bambae i lidim ol ami blong God blong oli mekem faet ya long Amagedon. Tingbaot se, Jisas nao we Jeova i jusumaot hem blong i kam king blong gavman blong Hem. From samting ya, Jisas i stap werem hat blong king. Mo naef blong faet we hem i karem, i soem se bambae hem i kilim i ded ol enemi blong God. ?Yu yu sapraes we God bambae i kilim i ded ol rabis man?
Traem lukluk bakegen long Stori 10. ?Stori ya i soemaot wanem? Yes, Bigfala Wota i ron blong kilim i ded ol man nogud. ?Hu i mekem Bigfala Wota ya i ron? Jeova God. Nao traem lukluk Stori 15. ?Wanem i stap hapen long pija ya? Jeova i sanem faea i aot long heven i kamdaon, blong spolem tufala taon ya Sodom mo Gomora.
Yu save lukluk Stori 33 tu. ?Wanem i stap hapen long ol hos mo kat blong ol man Ijip? ?Hu i mekem se wota ya i foldaon antap long olgeta ya? Jeova. Hem i mekem samting ya blong sevem ol man blong hem. Nao traem lukluk Stori 76. Long ples ya, Jeova i letem ol man blong hem, ol man Isrel, oli go long han blong ol enemi blong olgeta, from rabis fasin blong olgeta.
Taswe, yumi no mas sapraes we Jeova bambae i sanem ol ami blong hem oli aot long heven, blong oli finisim ol rabis fasin long wol ya. ?Wanem bambae i hapen biaen? Blong faenemaot, tanem pej i go long nekis stori
Revelesen 16:16; 19:11-16.
Ol Kwestin
- ?From wanem Baebol i tokbaot ol hos long heven?
- ?Wanem nem blong faet blong God agensem ol man nogud long wol ya? ?Faet ya bambae i mekem wanem?
- ?Pija ya i soem se hu nao i lidim faet ya? ?From wanem hem i werem hat blong king? ?Wanem mining blong naef blong faet we hem i karem?
- Traem lukluk bak long Stori 10, 15 mo 33, nao talem: ?From wanem yumi no sapraes se bambae God i spolem ol rabis man long wol ya?
- ?Olsem wanem Stori 36 mo Stori 76 oli soem se God bambae i spolem ol man nogud nating se ol man ya oli stap talem se oli mekem wosip long Hem?
Sam narafala kwestin
- Ridim Revelesen 19:11-16.
?Olsem wanem Baebol i mekem i klia se Jisas Kraes nao i sidaon long waet hos ya? (Rev. 1:5; 3:14; 19:11; Aes. 11:4)
?Olsem wanem blad we i stap long klos blong Jisas i soemaot se bambae hem i win fulwan long faet ya? (Rev. 14:18-20; 19:13; Aes. 63:1-6)
?Ating hu ya sam long ol soldia we oli folem Jisas taem i raed i go long waet hos? (Rev. 12:7; 19:14; Mat. 25:31, 32)