Taem Jehova i stanemap plan blong famle, hem i givim wok long ol papa mo mama blong oli lukaot long ol pikinini blong olgeta. (Kolosi 3:20) Taem yutufala i gat pikinini, i wok blong yutufala nao, blong tijim hem blong i lavem Jehova, mo blong trenem hem blong i kam naf blong holem wok. (2 Timoti 1:5; 3:15) Yutufala i mas kasemsave wanem i stap long hat blong hem, mo yutufala i mas soemaot gudfala eksampol long hem. Bambae yutufala i save tijim gud pikinini blong yutufala long tok blong Jehova, sipos tok ya i stap fastaem long hat blong yutufala.—Ol Sam 40:8.

?BAEBOL I TALEM WANEM? ‘Yu mas rere blong lesin, be yu no mas hareap blong toktok.’ (Jemes 1:19) ?Olsem wanem? ?Yu yu wantem we pikinini blong yu i talemaot ol tingting blong hem long yu? Fastaem, hem i mas save se yu yu rere blong lesin. Taem yu storian wetem hem, yu mas toktok long kwaet fasin. Olsem nao, bambae hem i no fraet blong talemaot tingting blong hem. (Jemes 3:18) Sipos hem i luk se bambae yu rao no yu faenem poen long hem, bambae hem i fraet blong talemaot evri samting. Yu mas gat longfala tingting, mo yu mas talem long hem oltaem se yu lavem hem.—Matiu 3:17; 1 Korin 8:1.

?YU SAVE MEKEM WANEM?

• Taem pikinini blong yu i wantem storian wetem yu, yu mas rere blong lesin

• Yu mas storian wetem hem oltaem, i no long taem we hem i kasem trabol nomo

?BAEBOL I TALEM WANEM? “Man we i stap lesin gud long ol samting we ol man oli stap tijim hem long hem, laef blong hem bambae i save gohed gud.” (Ol Proveb 16:20) Be i no naf blong lesin nomo long toktok blong pikinini blong yu. Yu mas kasem save long samting we i rili stap long tingting blong hem. I isi blong pikinini i haedem tingting blong hem, mo i save giaman tu. Long taem olsem, yu tingbaot advaes ya blong Baebol se: ‘Yu mas lesin long tok blong ol man fastaem, nao biaen yu save givim ansa long olgeta. Sipos no, fasin ya i soemaot we yu yu no gat hed.’ (Ol Proveb 18:13) Taswe, yu no mas kros kwik.—Ol Proveb 19:11.

?YU SAVE MEKEM WANEM?

• Maet pikinini i tokbaot samting we yu ting se i no impoten, be yu no katem tok blong hem mo yu no faerap long hem

• Yu tingbaot se taem yu yu smol, ating yu tu yu toktok olsem, be yu wantem we papa mo mama blong yu i lesin

?BAEBOL I TALEM WANEM? “Pikinini blong mi, yu yu mas lesin gud long ol samting we mi wetem mama blong yu, mitufala i stap tijim yu long hem, mo yu no mas lego ol samting ya.” (Ol Proveb 1:8) Jehova i givim raet long papa mo mama blong tijim pikinini. Yutufala i mas tijim pikinini blong i gat respek long yutufala mo i obei long yutufala. (Efesas 6:1-3) Sipos yutufala i no ‘joen gud long wan tingting,’ pikinini bambae i luksave samting ya. (1 Korin 1:10) Sipos yutufala i no gat sem tingting, yutufala i no mas rao long fored blong pikinini. Samting ya i save mekem se pikinini i no moa gat respek long yutufala.

?YU SAVE MEKEM WANEM?

• Yutufala i storian tugeta blong agri long wan rod we yutufala i save folem blong stretem pikinini

• Sipos yutufala i gat defdefren tingting, yu traem kasem save long tingting blong man no woman blong yu

?BAEBOL I TALEM WANEM? “Yu tijimgud pikinini blong yu long fasin we i stret blong hem i folem.” (Ol Proveb 22:6) Be fastaem yu mas gat wan plan we yu save folem blong tijim hem. Hemia i minim tu, ol rul we bambae yu folem blong stretem pikinini blong yu. (Ol Sam 127:4; Ol Proveb 29:17) Taem yu stretem pikinini, yu no mas givim panis nomo long hem, be yu mas givhan long hem tu blong hem i kasem save from wanem yu panisim hem. (Ol Proveb 28:7) Mo tu, yu tijim hem blong i laekem ol loa blong Jehova, mo blong i save wanem blong mekem taem i no gat wan klia loa blong folem. (Ol Sam 1:2) Olsem nao, bambae hem i naf blong jusumaot wanem fasin i stret mo wanem fasin we i no stret.—Hibrus 5:14.

?YU SAVE MEKEM WANEM?

• Yu mas tijim pikinini blong i save Jehova olsem wan man we i laef i stap, mo blong i trastem Jehova

• Yu givhan long hem blong i luksave ol nogud fasin, olsem ol doti fasin long Intenet, mo blong i blokem olgeta. Mo tu, yu givhan long hem blong i stap longwe long ol man we oli traem pulum hem blong mekem rabis fasin