Jehova i halpem yumi long plante defren rod. Hem i save halpem yu blong stap kwaet taem wan man i agensem yu. Mo tu, hem i save halpem yu blong tingbaot stret vas blong yusum, taem wan man i intres. Mo hem i save givim paoa blong yu save gohed blong prij, nating se ol man oli no wantem lesin. (Jer. 20:7-9) Jehova i mekem i gud long yumi taem hem i trenem yumi blong prij. Long miting blong medel wik, i gat sam gudfala fastok we yumi save yusum long wok blong prij. Fastaem, maet yumi fraet blong traem ol niufala rod ya, be sipos yumi mekem olsem, bambae yumi luk se oli wok gud long teritori blong yumi. Long ol miting mo ol asembli blong yumi, yumi kasem advaes blong traem ol defren wei blong prij, we yumi neva traem bifo. Maet hemia tu i mekem yumi fraet, be sipos yumi traem ol defren rod ya, Jehova bambae i blesem yumi. w21.08 27 ¶5-6

Aposol Pol i givim strong advaes taem hem i raetem leta i go long olgeta long Korin. Afta we hem i raetem leta ya, hem i sanem Taetas blong i go visitim olgeta. !Hem i glad tumas blong harem se oli akseptem advaes ya mo folem! (2 Kor. 7:6, 7) Ol elda oli folem eksampol blong Pol taem oli spenem taem wetem ol brata mo sista. Oli save kam eli long miting blong storian mo leftemap tingting blong ol narafala. I tekem sam minit nomo blong leftemap tingting blong wan brata o sista. (Rom 1:12) Wan elda we i folem eksampol blong Pol, bambae i yusum Baebol tu blong mekem bilif blong ol brata mo sista i kam strong, mo blong mekem oli save se God i lavem olgeta. Hem i tekem janis blong talem gudfala tok from ol samting we oli mekem. Taem wan elda i wantem givim advaes, hem i mas meksua se advaes blong hem i stanap long Tok blong God. Hem i tok stret be long fasin we i kaen, from hem i wantem se brata o sista ya i folem advaes we hem i givim.—Gal. 6:1. w22.03 28-29 ¶11-12

Jehova i givim “paoa ya we i bigwan bitim mak” long ol man blong hem, blong oli save gohed blong mekem wok blong hem. Wan rod we yumi kasem paoa, hemia taem yumi prea. Long Efesas 6:18, aposol Pol i enkarejem yumi blong “prea enitaem” long God. Mo God bambae i ansa taem i givim paoa long yumi. Maet samtaem yumi harem se yumi no save stanap strong o yumi no save wanem blong prea from. Be Jehova i wantem se yumi prea long hem, nating sipos i had blong talemaot ol tingting mo filing blong yumi. (Rom 8:26, 27) Hem i yusum Baebol tu blong givim paoa. Pol i kasem paoa mo i haremgud taem i ridim Baebol, mo yumi tu yumi mas mekem sem mak. (Rom 15:4) Taem yumi ridim Baebol mo tingting dip long hem, Jehova i save givhan long yumi blong kasemsave olsem wanem Baebol i save halpem yumi.—Hib. 4:12. w21.05 22 ¶8-10

Yumi save se i impoten blong tijim narafala, be maet i gat sam problem we i mekem se i had blong yumi mekem wok. Maet yumi harem se yumi no naf blong mekem moa. Eksampol, sam pablisa oli olfala o oli stap siksik. ?Hemia nao situesen blong yu? Sipos yes, !tingbaot se yumi save yusum telefon o wan narafala elektronik divaes blong mekem Baebol stadi! Taswe yu save stap long haos nomo mo mekem Baebol stadi. Samfala oli wantem stadi Baebol, be oli no fri long ol taem we ol brata sista oli jusum blong prij. Be maet oli fri blong stadi long eli moning o let naet. ?Yu glad blong mekem sam jenis blong stadi wetem ol man olsem? Jisas i storian wetem Nikodimas long naet, hemia wan taem we i stret long Nikodimas.—Jon 3:1, 2. w21.07 5 ¶10-11

Ol disaepol blong Jon Baptaes oli sapraes from we ol disaepol blong Jisas oli no mekem fasting. Jisas i eksplenem se taem hem i laef yet, i no nid blong oli mekem fasting. (Mat. 9:14-17) Be ol Farisi mo ol man we oli agensem Jisas, oli no laekem hem nating from we hem i no folem ol kastom blong olgeta. Oli kros taem Jisas i hilim ol sikman long Sabat. (Mak 3:1-6; Jon 9:16) Oli praod se oli stap obei long loa blong Sabat, be oli gohed blong mekem bisnes insaed long tempol. Mo taem Jisas i tok strong long olgeta from samting we oli stap mekem, oli kros tumas long hem. (Mat. 21:12, 13, 15) Mo olgeta we Jisas i prij long olgeta insaed long sinagog long Nasaret oli kros we oli kros, taem Jisas i talem se oli olsem ol man Isrel bifo we oli tingbaot olgeta nomo mo oli no gat bilif. (Luk 4:16, 25-30) From we fasin blong Jisas i defren long wanem we ol man oli ekspektem, plante man oli stambol.—Mat. 11:16-19. w21.05 5-6 ¶13-14

Wan rod we Jehova i yusum blong wonem yumi long fasin blong praod mo griri, hemia tru long ol stori blong ol man blong Jehova. Taem yumi harem tok ya griri, ating faswan man we yumi tingbaot hemia Devel Setan. Taem hem i stap olsem wan gudfala enjel blong Jehova, ating hem i bin gat plante gudfala privilej. Be hem i harem se hemia i no naf, hem i wantem kasem wosip we Jehova nomo i gat raet blong kasem. Setan i wantem se yumi kam olsem hem, so hem i traem pulum yumi blong gat moa samting. Faswan taem we hem i mekem olsem, hemia taem hem i toktok wetem Iv. Jehova i letem Iv mo hasban blong hem blong tufala i save kakae frut blong “evri tri we oli stap long garen ya,” be wan nomo hem i blokem. (Jen. 2:16) Be yet, Setan i pulum Iv blong gat tingting ya se hem i mas kakae frut blong tri ya we Jehova i blokem. Iv i foldaon long trap ya blong wantem moa samting. Ale hem i mekem sin, mo biaen hem i ded.—Jen. 3:6, 19. w21.06 14-15 ¶2-3; 17 ¶9

Jehova i wantem se Adam mo Iv i gat ol pikinini mo tufala i lukaot gud long wol ya. Sipos Adam mo Iv i obei mo folem gud plan blong Jehova, tufala wetem olgeta pikinini blong tufala bambae oli save stap long famle blong God olwe. Adam mo Iv i gat bigfala blesing ya blong kam pat blong famle blong Jehova. Folem Ol Sam 8:5 mo futnot, Deved i tokbaot man we Jehova i krietem, i se: “Yu mekem hem i stap daon lelebet long ol enjel, mo yu mekem hem i kasem glori mo ol gudgudfala samting olsem hat blong king.” I tru, Jehova i no givim sem paoa, save, mo gudhan long man olsem we i givim long ol enjel. (Sam 103:20) Nating se i olsem, ol man oli “stap daon” smol nomo long ol enjel we oli gat bigfala paoa. Sore tumas, Adam mo Iv i no moa pat blong famle blong Jehova. Hemia i mekem bigfala problem long olgeta we oli kamaot biaen long tufala. Be plan blong Jehova i no jenis, hem i wantem se ol man we oli obei oli kam pikinini blong hem olwe. w21.08 2-3 ¶2-4

Tede, plante man blong Jehova oli stap fesem fasin agens. Sam oli laef long ol kantri we gavman i traem blong blokem wok blong yumi. Maet oli arestem ol brata mo ‘tekem olgeta i go stanap long fes blong ol hed gavman mo ol king,’ mo hemia i givim witnes long olgeta. (Mat. 10:17, 18) Ol narafala Witnes, maet oli fesem fasin agens long wan defren rod. Oli laef long wan kantri we oli fri blong wosipim Jehova, be ol famle blong olgeta oli agensem olgeta mo traem stopem olgeta blong oli no moa mekem wok blong God. (Mat. 10:32-36) Be taem oli luksave se oli no naf blong stopem olgeta, oli no moa agensem olgeta. Samfala we bifo oli strong blong agens, oli kam ol Witnes we oli wok strong long wok blong Jehova. !Taem ol man oli agensem yu, yu no mas stop blong mekem wok blong Jehova! Be yu mas gat strong tingting. !Jehova i stap givhan long yu wetem tabu spirit blong hem, taswe yu no nid blong fraet! w22.03 16 ¶8

Baebol i soemaot se Jehova i no laekem nating “fasin blong flas, giaman, mo kilim man i ded.” (Prov. 6:16, 17) Mo tu, hem “i no laekem nating fasin blong faet mo ol man blong giaman.” (Sam 5:6) Jehova i no laekem nating ol nogud fasin ya. Taswe hem i finisim ol rabis man long taem blong Noa from we oli mekem wol ya i fulap long ol raf fasin. (Jen. 6:13) Mo tu, Jehova i talem long profet Malakae se Hem i no laekem nating olgeta we oli stap divosem patna blong olgeta we i no mekem sin. Hem i no akseptem wosip blong olgeta mo bambae hem i jajem olgeta from fasin blong olgeta. (Mal. 2:13-16; Hib. 13:4) Jehova i wantem se yumi “mas agensem ol samting we oli rabis.” (Rom 12:9) Tok ya “agensem” i minim wan strong filing we yumi gat blong no laekem nating wan samting. Yumi mas gat sem lukluk olsem Jehova long ol fasin we hem i no laekem nating. w22.03 4-5 ¶11-12

Klosap nao Papa blong yumi long heven bambae i blesem yumi tru long Kingdom blong hem. Olgeta we oli gohed blong wet long Jehova bambae oli kasem plante blesing naoia mo long niufala wol we bambae i kam. Taem ol man blong God oli go insaed long niufala wol, bambae oli no moa nid blong stanap strong long ol problem we oli stap fesem tede. Fasin blong mekem i nogud long narafala mo harem nogud bambae i finis. (Rev. 21:4) Bambae yumi no nid blong wari from ol samting we yumi nidim, from we bambae i gat i naf samting blong evriwan. (Sam 72:16; Aes. 54:13) !Hemia wan nambawan blesing! Jehova i stap rerem yumi naoia blong laef aninit long rul blong hem, taem i halpem yumi blong winim ol nogud fasin mo wokem ol gudfala fasin we hem i glad long hem. Yu no harem nogud mo yu no givap. !I gat wan nambawan laef i stap long fored blong yumi! !Taem yumi stap wet from laef ya, i gud yumi gohed blong glad blong wet long Jehova blong mekem ol samting we hem i promes blong mekem oli kamtru! w21.08 13 ¶17-19

Smoltaem afta we ol Kristin long Judia oli kasem leta blong aposol Pol, oli lego haos blong olgeta, bisnes blong olgeta, mo ol famle blong olgeta we oli no Kristin, mo “oli ronwe i go long ol bigfala hil.” (Mat. 24:16) Long taem ya, i rili impoten blong oli givgivhan long olgeta. Sipos oli bin folem advaes blong Pol blong serem olting blong olgeta wetem ol narafala, bambae i isi blong oli glad nomo long wanem samting we oli gat, long niufala ples we oli go long hem. Maet i no oltaem we ol brata mo sista oli talem samting we oli nidim. Taswe yu mas mekem i isi blong oli save askem help long yu. I sua se yu save gud ol brata mo sista long kongregesen blong yu we oltaem oli rere blong givhan long ol narafala. Oli neva mekem yumi harem se yumi stap mekem hadwok long olgeta. Yumi save se oltaem oli rere blong halpem yumi, mo maet yumi wantem mekem sem mak olsem olgeta. w22.02 23-24 ¶13-15

Long ol yia we i jes pas, i gat plante jenis long ol kongregesen mo ol eria. Sipos oli askem yumi blong joen long wan narafala kongregesen, maet yumi faenem i had blong lego ol fren mo famle blong yumi. ?Jehova nao i talem long ol elda wanem kongregesen blong sanem ol pablisa i go long hem? Nogat. Mo maet hemia nao i mekem i had blong folem daereksen we yumi kasem. Be Jehova i trastem ol elda blong mekem ol desisen olsem, mo yumi tu yumi mas trastem olgeta. ?From wanem yumi mas sapotem desisen blong ol elda, nating sipos i no laenap wetem tingting blong yumi? Taem yumi mekem olsem, yumi stap givhan blong mekem se i gat pis bitwin ol man blong God. Bambae kongregesen i kasem glad taem evriwan i sapotem ol desisen blong ol elda. (Hib. 13:17) Samting we i moa impoten se yumi soem se yumi trastem Jehova, taem yumi sapotem desisen blong ol man we hem i putumap blong oli lukaot long yumi.—Wok 20:28. w22.02 4-5 ¶9-10

Sipos yu yu wan brata we i baptaes, maet yu save wok had blong kam gud moa long fasin blong prij mo tij. ?From wanem? From we sipos yu traehad blong kam wan gudfala man blong toktok mo rid, mo wan gudfala tija, bambae yu naf blong halpem olgeta we oli stap lesin long yu. (1 Tim. 4:15) Traem putum mak ya blong stadi mo folem gud evri advaes we i stap long buklet ya Kamgud Moa Blong Rid Mo Tij. Traem stadi long ol wanwan advaes ya, praktis gud long haos, mo folem advaes ya taem yu givim wan tok. Askem sam advaes long nambatu brata blong givim advaes o ol narafala elda we oli “wok strong blong talemaot tok blong God mo blong tijim ol man.” (1 Tim. 5:17) I gud yu folem ol advaes we i stap long buklet, be yu mas traehad tu blong halpem olgeta we oli lesin blong oli mekem bilif blong olgeta i kam strong, mo blong oli folem ol samting we oli lanem. Sipos yu mekem olsem, bambae yu kasem moa glad, mo olgeta tu bambae oli glad. w21.08 24 ¶17

Sipos yumi luk ol narafala se oli hae moa, bambae yumi no traem kompit wetem olgeta we oli gat gudhan mo oli save mekem plante moa samting i bitim yumi. Be bambae yumi glad long olgeta, speseli sipos oli yusum save mo gudhan blong olgeta long wok blong Jehova. Nao bambae kongregesen i gat pis mo i joen gud. Yumi save blokem jalus, sipos yumi gat tingting daon mo yumi luksave se yumi gat limit blong yumi. Sipos yumi gat tingting daon bambae yumi no traem soem se yumi gat gudhan o yumi gud moa long narafala. Defren olgeta, bambae yumi traehad blong lanem samting long olgeta we oli gat moa save long yumi. Eksampol, sipos wan brata long kongregesen i givim wan naes pablik tok, maet yumi save askem olsem wanem nao hem i rerem tok ya. Sipos wan sista i gat gudhan blong kuk, maet yumi save askem hem blong i givhan long yumi blong kam gud moa long saed ya. w21.07 15-16 ¶8-9

Long buk blong Namba, Jehova i talem se oli mas kilim i ded wan man Isrel we i stap pikimap faeawud long Sabat dei. Plante yia afta, long buk blong seken Samuel, yumi luk we Jehova i fogivim King Deved we i mekem adaltri mo i kilim man i ded. (Nam. 15:32, 35; 2 Saml. 12:9, 13) Maet yumi gat tingting se, ‘?from wanem Jehova i fogivim Deved, be i givim oda blong oli kilim i ded wan man we i luk olsem se sin blong hem i smol nomo?’ I no oltaem we Baebol i givim evri smosmol save long saed blong wan stori. Yumi save se Deved i rili sore mo i tanem tingting from aksen blong hem. (Sam 51:2-4) ?Be olsem wanem long man ya we i brekem loa blong Sabat? ?Hem i sore from samting we hem i mekem? ?I gat sam taem bifo finis we hem i no obei long loa blong Jehova? ?Hem i sakemaot ol woning we oli givim long hem? Baebol i no tokbaot samting ya. Be save we yumi gat finis long God blong yumi, i mekem yumi sua se “olgeta samting we [hem] i stap mekem, oli stret nomo.”—Sam 145:17. w22.02 2-3 ¶3-4

Wan man we i no flas i luksave se i gat sam samting we hem i no naf blong mekem. From samting ya, bambae hem i gohed blong stap glad mo i wok had. Yumi save komperem wan man we i no flas wetem wan man we i stap draevem trak i go antap long wan hil. Draeva i mas jenisim gia i go long namba wan blong i save go antap long hil ya. I tru se trak i ron slo moa, be bambae i gohed yet blong ron i go antap. Long sem fasin, wan man we i no flas i save wetaem i stret blong “jenisim gia,” blong hem i save gohed blong mekem wok blong Jehova mo halpem ol narafala. (Fil. 4:5) Traem tingbaot Basilae. Hem i gat 80 yia taem King Deved i invaetem hem blong i kam stap long haos blong king. Be from Basilae i gat tingting daon mo i no flas, hem i no akseptem invetesen blong king. Basilae i luksave se hem i no naf blong mekem plante samting. Taswe hem i askem blong oli tekem yangfala man ya Kimam blong i tekem ples blong hem. (2 Saml. 19:35-37) Olsem Basilae, ol olfala brata oli glad nomo blong letem ol yangfala brata oli mekem ol wok. w21.09 10 ¶6-7

?Yu yu faenem i had blong tingbaot Jehova olsem wan Papa we i gat lav? Sipos yumi gruap long wan famle we perens blong yumi i no kaen, maet bambae i had blong kasem save se Jehova i lavem yumi. Be yumi glad blong save se Jehova i kasemsave long filing blong yumi. Hem i wantem stap klosap long yumi. Baebol i talem se: “Yufala i mas kam klosap long God, nao hem bambae i kam klosap long yufala.” (Jem. 4:8) Jehova i lavem yumi mo i talem se bambae hem i kam olsem beswan Papa blong yumi. Jisas i save halpem yumi blong kam klosap moa long Jehova. Jisas i save gud Jehova mo i folem gud ol fasin blong Hem, taswe hem i save talem se: “Man we i luk mi, hem i luk Papa tu.” (Jon 14:9) Jisas i olsem wan bigfala brata we i tijim yumi olsem wanem blong respektem mo obei long Papa blong yumi, no mekem Hem i harem nogud, mo mekem Hem i glad. Be long ful laef blong Jisas long wol ya, hem i soemaot se Jehova i kaen mo i lavem man. w21.09 21 ¶4-5

Ol man blong Jehova oli joen gud blong wosipim God ya we i tru. Jehova i trastem ol elda mo i givim impoten wok long olgeta blong kipim kongregesen i stap klin. Sipos wan Kristin i mekem bigfala sin, Jehova i ekspektem ol elda blong mekem desisen se Kristin ya bambae i stap long kongregesen o nogat. Oli mas faenemaot sipos man ya i rili sore mo i tanem tingting blong hem. Maet hem i save talem se hem i tanem tingting blong hem, ?be i tru se hem i no laekem nating samting we hem i bin mekem? ?Hem i gat strong tingting blong no moa mekem sin ya? Sipos samting we i pulum hem blong mekem sin hemia ol rabis fren, ?hem i rere fulwan blong lego ol rabis fren ya? Ol elda oli prea long Jehova, oli skelem samting we man ya i talem, mo samting we Baebol i talem, mo oli jekem filing blong man ya long samting we hem i bin mekem. Biaen, bambae oli mekem desisen sipos man ya i save stap long kongregesen o hem i mas disfelosip.—1 Kor. 5:11-13. w22.02 5 ¶11-12

Nating se yumi baptaes sam dei i pas o blong plante yia, be yumi evriwan i wantem wokem ol fasin we Jehova i laekem. Blong wokem ol fasin olsem, yumi mas kontrolem tingting blong yumi. ?From wanem? From samting we i gat paoa long ol fasin blong yumi, hemia tingting blong yumi. Sipos oltaem yumi stap tingbaot ol samting we yumi nomo i wantem, bambae yumi talem mo mekem ol samting we i no stret. (Efes. 4:17-19) Be sipos yumi stap tingbaot ol gudfala samting, bambae yumi talem mo mekem ol samting we Jehova i glad long hem. (Gal. 5:16) Yumi no save blokem fulwan ol nogud tingting we oli kam long maen blong yumi. Be yumi save jusum blong no tekem aksen folem ol nogud tingting ya. Bifo we yumi tekem baptaes, yumi mas stop blong talem mo mekem ol fasin we Jehova i no laekem. Hemia nao faswan impoten step blong tekemaot olfala fasin blong yumi. Be blong Jehova i glad fulwan long yumi, yumi mas werem niufala fasin we God i givim long yumi. w22.03 8 ¶1-2

I no isi blong ol elda oli save sipos man we i mekem bigfala sin i rili tanem tingting blong hem. ?From wanem? From we ol elda oli no save luk samting we i stap long hat blong man. Taswe oli traem faenemaot ol pruf we i soemaot klia sipos brata ya i rili tanem tingting from samting we hem i mekem o nogat. Oli nidim blong luk pruf we i soemaot se hem i jenisim tingting, filing, mo fasin blong hem. Maet i tekem longtaem blong man ya we i disfelosip i pruvum se hem i rili tanem tingting blong hem. Hem i mas kam oltaem long ol miting, mo i mas folem gud advaes blong ol elda blong prea mo stadi Baebol oltaem. Mo tu, hem i mas wok had blong blokem ol samting we oli save pulum hem blong foldaon long sem sin ya bakegen. Sipos hem i traehad blong frengud wetem Jehova bakegen, hem i save sua se Jehova bambae i fogivim hem fulwan, mo kongregesen bambae i tekembak hem. w21.10 6-7 ¶16-18

Jisas i lavem Jehova tumas mo hem i wosipim Jehova nomo, taem hem i stap long heven mo long wol. (Luk 4:8) Mo hem i tijim ol disaepol blong hem blong oli mekem sem mak. Jisas mo ol disaepol oli neva yusum ol pija long wosip blong olgeta. From we God i Spirit, i no gat man i save wokem wan samting we i luk olsem God. (Aes. 46:5) ?Be olsem wanem sipos man i mekem pija blong ol tabu man (saint) mo i prea long olgeta? Seken loa we Jehova i talem long Ten Komanmen, hemia vas blong tede. Ol tok ya oli klia gud long ol man we oli wantem mekem God i glad. Ol man blong stadi long histri oli talem se long taem blong ol aposol, ol Kristin oli wosipim God nomo. Ol Witnes blong Jehova oli gat sem tingting olsem ol faswan Kristin ya. w21.10 19-20 ¶5-6

Jisas i givim woning long ol fas Kristin long Judia se i gat taem i stap kam we bambae “ol soldia oli raonemgud” Jerusalem. (Luk 21:20-24) Taem samting ya i hapen, oli mas “ronwe i go long ol bigfala hil.” Sipos oli ronwe, bambae oli stap laef, be oli mas lego plante samting. Sam yia i pas, wan Wajtaoa i talem se: “Oli livim ol garen mo ol haos blong olgeta, mo oli no tekem taem blong pikimap ol samting blong olgeta long haos. Oli trastem paoa blong Jehova blong protektem olgeta mo givhan long olgeta. Taswe oli putum wosip blong Jehova long fas ples, bitim evri narafala impoten samting.” Mo i talem tu se: “Maet bambae yumi gat traem long saed blong olgeta samting blong yumi, mo olsem wanem yumi tingbaot olgeta. ?Oli impoten tumas long yumi, bitim evri samting? ?No ating i moa impoten blong sevem laef blong yumi, wetem olgeta we oli stap long saed blong God? Tru ya, maet taem yumi ronwe, bambae yumi kasem hadtaem mo yumi sot long sam samting. Bambae yumi mas rere blong mekem evri samting we yumi mas mekem long taem ya.” w22.01 4 ¶7-8

I no longtaem afta we ol man Isrel oli aot long Ijip, Jehova i talemaot nem blong Hem mo ol fasin blong Hem long Moses. Hem i se: “Jehova, Jehova, wan God we i gat sore mo i kaen, i no save kros kwik, mo fasin blong hem blong lavem man oltaem i bigwan tumas, mo hem i tok tru. Oltaem hem i soemaot se hem i lavem plante taosen man, hem i fogivim man we i mekem rong, no i brekem loa, no i mekem sin.” (Eks. 34:6, 7) Ol gudfala tok ya oli soemaot long Moses wan spesel samting long saed blong lav ya blong Jehova. ?Wanem samting ya? Jehova i no talem nomo se hem i lavem man tumas, be i se “fasin blong hem blong lavem man oltaem i bigwan tumas.” Tok ya i kamaot sikis taem bakegen long Baebol. (Nam. 14:18; Neh. 9:17; Sam 86:15; 103:8; Joel 2:13; Jona 4:2) Evritaem we oli talem tok ya, oli yusum nomo blong tokbaot Jehova be i no man. I naes blong luk olsem wanem Jehova i tokbaot hem wan olsem long Baebol. w21.11 2-3 ¶3-4

Ol mared kapol oli save lanem lesen from aposol Pita mo waef blong hem. Samwe sikis manis o wan yia afta we Pita i mitim Jisas, hem i mas mekem wan impoten desisen. Pita i gat bisnes blong salem fis blong lukaot long nid blong famle blong hem. Taem Jisas i invaetem Pita blong i folem hem fultaem, Pita i mas tingbaot waef blong hem tu. (Luk 5:1-11) Pita i jusum blong go mo prij wetem Jisas. Mo i sua se waef blong hem tu i sapotem desisen ya. Baebol i soemaot se afta we Jisas i laef bakegen, waef blong Pita i bin travel wetem hem. (1 Kor. 9:5) Taswe, from we hem i wan gudfala Kristin waef, hemia i mekem se Pita i save givim ol gudfala advaes long ol Kristin hasban mo waef. (1 Pita 3:1-7) Pita mo waef blong hem i trastem Jehova se bambae Hem i givim samting we tufala i nidim, sipos tufala i putum Kingdom fasples long laef blong tufala.—Mat. 6:31-34. w21.11 18 ¶14

Aposol Pol i lavem ol brata mo sista, mo hem i wok had blong givhan long olgeta. (Wok 20:31) Hemia nao from wanem ol brata sista oli lavem hem tumas. Eksampol, taem ol elda long Efesas oli harem se bambae oli neva luk Pol bakegen, “oli krae we oli krae.” (Wok 20:37) Ol elda tu oli lavem ol brata mo sista mo oli mekem evri samting we oli naf blong mekem blong givhan long olgeta. (Fil. 2:16, 17) Be samtaem, i had blong ol elda oli mekem evri samting we oli mas mekem. ?Long taem olsem, wanem i save givhan long olgeta? Ol elda oli save tingbaot eksampol blong Pol. Hem i no gat paoa olsem ol enjel. Hem i wan sinman, mo samtaem i had long hem tu blong mekem samting we i stret. (Rom 7:18-20) Pol i fesem sam problem, be nating se i olsem, hem i no stop blong givhan long ol brata sista mo i no lusum glad. Taem ol elda oli folem eksampol blong Pol, oli save gohed blong mekem wok blong Jehova wetem glad, nating se oli fesem sam problem. w22.03 26 ¶1-2

Levitikas 19:3 i talem se oli mas kipim Sabat. Tede ol Kristin oli no moa stap aninit long Loa blong Moses, taswe yumi no nid blong kipim Sabat. Nating se i olsem, yumi save lanem plante samting long eksampol blong ol man Isrel blong kipim Sabat, mo gudfala blesing we oli kasem taem oli mekem olsem. Sabat i wan taem blong wosipim God mo spel long ol wok. Taswe long Sabat dei, Jisas i stap go long sinagog long taon blong hem mo i ridim Tok blong God. (Eks. 31:12-15; Luk 4:16-18) Komanmen ya we God i talem blong “kipim ol sabat” i sud pulum yumi blong makemaot sam taem evri dei blong mekem ol samting long saed blong spirit. ?Olsem wanem? ?Yu save mekem sam jenis, blong obei moa long komanmen ya? Sipos yu makemaot taem blong mekem ol samting long saed blong spirit, bambae yu frengud wetem Jehova, mo hemia nao impoten samting we yu mas mekem blong stap tabu. w21.12 5 ¶13

Taem Jisas i stap long wol, hem i joen wetem olgeta kaen man. Hem i kakae wetem ol man we oli rij mo oli  gat paoa, be tu hem i spenem taem wetem ol puaman mo ol man we narafala i stap spolem olgeta. Mo tu, hem i tingbaot olgeta we ol man oli singaot olgeta se “ol man blong mekem sin.” Fasin ya blong Jisas i mekem se ol man we oli praod, oli stambol. Oli askem long ol disaepol se: “?From wanem yufala i stap kakae mo dring wanples wetem ol man blong tekem takis mo ol man blong mekem sin?” Ansa we Jisas i givim long olgeta i stap long vas blong tede. (Luk 5:29-31) Bifo we Mesaea i kamtru, profet Aesea i talem se ol man blong wol bambae oli no akseptem hem. Hem i se: “Ol man oli lukluk nogud long hem mo oli tanem baksaed long hem. . . . I olsem we oli haedem fes blong hem long yumi. Ol man oli lukluk nogud long hem, mo yumi luk hem olsem we hem i nating nomo.” (Aes. 53:3) “Ol man” bambae oli tanem baksaed long Mesaea, taswe ol man Jiu long taem blong Jisas oli save finis se ol man bambae oli no wantem lesin long Jisas. w21.05 8-9 ¶3-4

Sam Kristin bifo oli slo blong folem ol advaes. (Jem. 1:22) Sam narafala, oli stap mekem i gud moa long ol rijman. (Jem. 2:1-3) Sam narafala bakegen oli faenem i had blong kontrolem tang blong olgeta. (Jem. 3:8-10) Ol Kristin ya oli fesem sam bigfala problem, be Jemes i sua se oli save jenis. Hem i givim advaes long olgeta, be long wan fasin we i kaen mo i tok stret, mo hem i enkarejem olgeta we oli nidim help long saed blong spirit, blong oli go luk ol elda. (Jem. 5:13, 14) Lesen: Luksave samting, be gohed blong gat gudfala tingting long ol narafala. Plante man we yumi stadi Baebol wetem olgeta, oli faenem i had blong folem ol samting we oli lanem. (Jem. 4:1-4) Maet i had blong oli sakemaot ol nogud fasin, mo wokem ol gudfala fasin. Yumi mas gat strong tingting blong talem long olgeta, samting we oli mas kam gud moa long hem. Mo tu, yumi mas gat gudfala tingting mo trastem se Jehova bambae i pulum ol man we oli gat tingting daon blong oli kam long hem, mo bambae hem i givim paoa long olgeta blong oli save mekem ol jenis long laef blong olgeta.—Jem. 4:10. w22.01 11 ¶11-12

Olgeta Kristin oli traehad blong soem sore olsem Jehova. ?From wanem? Wan risen hemia from we Jehova bambae i no lesin long olgeta we oli no soem sore long narafala. Yumi evriwan i wantem se Jehova i lesin long ol prea blong yumi, taswe yumi no wantem mekem i strong o no soem sore long ol narafala. Yumi no wantem blokem sora blong yumi long wan Kristin we i stap safa, be yumi wantem rere oltaem blong lesin long “puaman we i stap krae.” Long sem fasin, yumi wantem mekem bes blong yumi blong folem wanem we Baebol i talem, se: “Sipos man i no gat sore long narafala, jaj tu bambae i no gat sore long hem taem i jajem hem.” (Jem. 2:13) Sipos yumi gat tingting daon mo yumi tingbaot se yumi nidim blong narafala i soem sore long yumi, hemia bambae i pulum yumi blong wantem soem sore tu long narafala. Be antap moa, yumi wantem soem sore long man we i tanem tingting from sin we hem i mekem mo i kambak long kongregesen. Ol eksampol long Baebol blong olgeta we oli kaen mo soem sore oli save halpem yumi blong soem sore mo no mekem i strong long narafala. w21.10 12 ¶16-17

Long naet bifo we Jisas i ded, hem i lukaotem wan ples we i kwaet blong hem i save tingting dip mo prea. Mo hem i faenem ples ya long garen blong Getsemane. Long taem ya, Jisas i talem wan impoten samting long ol disaepol blong hem long saed blong prea. Taem oli kamtru long garen blong Getsemane, maet hemia i medel naet finis. Jisas i askem long ol aposol blong oli “gohed blong wekap,” mo hem i aot i go prea. (Mat. 26:37-39) Be taem hem i stap prea, olgeta oli slip. Taem Jisas i luk we oli stap slip, hem i talem bakegen long olgeta se: “Yufala i mas gohed blong lukaot gud oltaem mo yufala i mas prea oltaem.” (Mat. 26:40, 41) Hem i luksave se olgeta tu oli wari tumas mo oli taed. Jisas i sore long olgeta mo i kasemsave se “bodi [blong olgeta] i slak.” Jisas i aot tu taem bakegen blong go prea, mo taem hem i kambak, hem i luk we ol disaepol blong hem oli stap slip be oli no prea.—Mat. 26:42-45. w22.01 28-29 ¶10-11