1, 2. ?Wanem i pulum yu blong lavem Jeova God?

?YU YU lavem God? Sipos yu givim laef blong yu i go long Jeova God finis, bambae yu talem “yes.” !Mo i stret tu we yu talem “yes”! Tru ya, i stret nomo we yumi ol man yumi lavem Jeova. Yumi lavem God from we yumi kasem save se hem i lavem yumi. Baebol i talem se: “Yumi stap lavem [Jeova] God mo ol narafala man, from we God i lavem yumi fastaem.”—1 Jon 4:19.

² Jeova i tekem aksen fastaem blong soemaot long yumi se hem i lavem yumi. Hem i wokem wan naesfala hom blong yumi, hemia wol ya. Hem i givim evri samting we yumi nidim long saed blong bodi. (Matiu 5:43-48) Be samting we i moa impoten we hem i givim, hemia ol samting we yumi nidim long saed blong wosip. Hem i givim Tok blong Hem, Baebol. Hem i askem yumi blong toktok wetem hem long prea, mo i promes se bambae hem i harem ol prea ya mo i givim tabu spirit blong halpem yumi. (Ol Sam 65:2; Luk 11:13) Antap long olgeta samting ya, hem i sanem Pikinini blong hem we hem i laekem tumas i kam, blong givim laef blong hem olsem wan ransom we bambae i pemaot yumi long sin mo ded. !Tru ya, lav we Jeova i soemaot long yumi i bigwan tumas!—Jon 3:16; Rom 5:8.

3. (a) ?Blong God i lavem yumi olwe, yumi mas mekem wanem? (b) ?Wanem impoten kwestin we yumi mas tingbaot, mo ansa blong kwestin ya i stap wea?

³ Jeova i wantem lavem yumi olwe. Be i stap long yumi  wanwan blong jusum sipos yumi wantem we hem i lavem yumi olwe. Tok blong God i givim advaes ya se: “Yufala i mas stap long laef ya we oltaem yufala i save se God i stap lavem yufala, mo . . . bambae . . . i givim laef long yufala we i no save finis.” (Jud 21) Tok ya “stap long laef ya” i soemaot se i gat samting we yumi mas mekem blong bambae God i lavem yumi olwe. Ol samting ya we yumi mekem oli soemaot se yumi tu yumi lavem hem. Taswe, wan impoten kwestin blong tingbaot hemia se, ‘?Olsem wanem mi save soemaot se mi lavem God?’ Ansa i stap long ol tok ya we tabu spirit i pulum aposol Jon blong raetem se: “Sipos yumi lavem God, hemia i min se yumi stap folem ol tok blong hem. Mo ol tok blong hem i no strong tumas blong folem.” (1 Jon 5:3) Yumi mas tekem taem blong  tingting gud long ol tok ya, from we yumi wantem soem long God blong yumi se yumi lavem hem tumas.

4, 5. ?Tokbaot olsem wanem yu yu stat blong lavem Jeova?

⁴ “Lavem God.” ?Aposol Jon i minim wanem taem hem i raetem tok ya? Hem i minim dip filing we wanwan man i gat long God. ?Yu yu tingbaot yet taem ya we yu yu jes stat blong lavem Jeova?

⁵ Tingtingbak long faswan taem ya we yu lanem trutok long saed blong Jeova mo ol stamba tingting blong hem, ale yu stat blong gat bilif. Yu yu kasem save se nating sipos yu wan sinman taem yu bon mo yu stap farawe long God, Jeova i yusum Jisas blong openem rod blong bambae yu save kam stret man olsem Adam fastaem, mo yu save gat laef we i no save finis. (Matiu 20:28; Rom 5:12, 18) Yu yu stat luksave se samting ya we Jeova i mekem i wan bigfala samting tumas, we hem i lego Pikinini ya blong hem we hem i laekem tumas, blong i ded from yu. Save ya i pulum yu blong yu wantem mekem wan samting, mo yu stat blong lavem God tumas from we hem i soemaot bigbigfala lav ya long yu.—1 Jon 4:9, 10.

6. ?Olsem wanem man i soemaot se hem i gat trufala lav, mo lav we yu gat long God i pulum yu blong mekem wanem?

⁶ Be dip filing ya blong yu, hemia i stat nomo blong trufala lav we yu mas gat long Jeova. Trufala lav i no wan filing nomo, mo i no long toktok blong yumi we yumi pruvum se yumi gat trufala lav ya. Nogat. Trufala lav ya i mas pulum yumi blong go moa. Ol wok blong yumi oli soemaot se yumi gat trufala lav, olsem we ol wok blong yumi oli soemaot se yumi gat bilif. (Jemes 2:26) Tru ya, taem yu lavem wan man yu mekem ol samting we man ya i save glad long hem. Taswe, taem yu stat blong lavem Jeova, yu harem se yu wantem blong mekem laef blong yu i laenap wetem ol samting we Papa blong yu long heven i glad long hem. ?Olsem wanem? ?Yu yu baptaes finis blong kam wan Witnes blong Jeova? Sipos yes, yu yu mekem from we yu lavem Jeova mo yu wantem stap tru long  hem. Nao yu mekem desisen ya we i moa impoten i bitim olgeta narafala desisen long laef blong yu. Yu yu givim laef blong yu long Jeova blong mekem ol samting we hem i wantem, mo yu baptaes blong soemaot desisen ya blong yu. (Rom 14:7, 8) Blong holem promes ya we yu mekem long Jeova, yu mas folem nekis toktok we aposol Jon i raetem.

7. ?Wanem sam long ol tok no loa blong God, mo man we i folem ol tok ya hem i stap mekem wanem?

⁷ Jon i talem se man we i lavem God bambae i “stap folem ol tok blong hem.” ?Wanem ya ol tok blong God? I gat plante defdefren loa we Jeova i putum i klia nomo long Tok blong hem, Baebol. Sam long ol loa ya oli talem se man i no mas drong, i no mas slip olbaot, i no mas wosip long aedol, i no mas stil, mo i no mas giaman. (1 Korin 5:11; 6:18; 10:14; Efesas 4:28; Kolosi 3:9) Man we i folem ol tok blong God hem i stap mekem laef blong hem i laenap wetem ol klia loa ya we oli stap long Baebol.

8, 9. ?Olsem wanem blong save samting we Jeova i glad long hem, taem i no gat wan loa long Baebol long saed ya? Givim wan eksampol.

⁸ Be blong mekem Jeova i glad, i no naf blong obei long ol loa ya nomo. Jeova i no wan God we bambae i blokem yumi wetem plante plante loa blong talem evri samting we yumi mas mekem long laef blong yumi. Taswe, evri dei yumi mas mekem desisen long plante samting, we i no gat wan loa long Baebol blong talem wanem we yumi mas mekem. Long taem olsem, ?olsem wanem blong save sipos Jeova bambae i glad long samting we yumi mekem? Baebol i givim klia save long saed blong ol tingting blong God. Taem yumi stadi long Baebol, yumi kasem save ol samting we Jeova i laekem mo ol samting we hem i no laekem nating. (Ol Sam 97:10; Ol Proveb 6:16-19) Yumi stat luksave ol tingting mo fasin we hem i tinghae long olgeta. Taem yumi savegud moa ol filing, tingting mo fasin blong Jeova, bambae i moa isi long yumi blong letem tingting blong hem i lidim yumi long ol desisen blong yumi mo long ol samting we yumi mekem. Ale, nating sipos i  no gat wan loa long Baebol blong talem samting we yumi mas mekem, be bambae yumi naf yet blong luksave ‘samting we Jeova i wantem blong yumi mekem.’—Efesas 5:17.

⁹ Tingbaot ol muvi mo samting we yumi wajem long televisin. I no gat wan loa long Baebol we i talem stret se yumi no mas wajem ol muvi we oli soem raf fasin mo rabis fasin long saed blong seks. ?Be yumi rili nidim we Jeova i putum wan loa blong talem se yumi no mas wajem ol samting olsem? Yumi save finis tingting blong Jeova long saed ya. Tok blong Hem i talem stret se: “[Jeova] i no laekem nating olgeta we oli laekem tumas blong mekem faet.” (Ol Sam 11:5) Mo hem i talem tu se: “God bambae i jajem boe mo gel we tufala i slip wanples, mo bambae i jajem man we i slip wetem woman we i no woman blong hem, mo woman we i slip wetem man we i no man blong hem.” (Hibrus 13:4) Taem yumi tingting gud long ol tok ya long Baebol, yumi luksave klia nomo wanem samting we Jeova i wantem yumi blong mekem. From samting ya, yumi no save harem gud blong wajem ol samting we oli soemaot long klia ples nomo ol rabis fasin we God blong yumi i no laekem nating. Yumi mas stap longwe long ol doti samting we wol ya i traem pulum yumi blong wajem olsem samting blong pleplei nomo. Yumi save se Jeova bambae i glad long yumi sipos yumi stap longwe long ol samting ya. *

10, 11. ?From wanem yumi jusum blong obei long Jeova, mo fasin blong yumi blong obei i mas olsem wanem?

¹⁰ ?Wanem faswan risen we i pulum yumi blong folem ol tok blong God? ?From wanem yumi traehad evri dei blong mekem laef blong yumi i laenap wetem tingting blong God? Yumi jusum rod ya, be i no from we yumi fraet we bambae God i panisim yumi, mo from we yumi no wantem kasem ol trabol ya we i stap kasem ol man we oli no obei long loa blong God. Nogat. (Galesia 6:7) Yumi ting se sipos yumi obei long Jeova, hemia i nambawan rod blong soemaot se yumi lavem hem. Olsem wan pikinini we i wantem tumas blong mekem  papa blong hem i glad, yumi tu yumi wantem mekem Jeova i glad. (Ol Sam 5:12, NW) Jeova i Papa blong yumi, mo yumi lavem hem. I no gat narafala samting we i mekem yumi glad mo yumi harem gud moa, i bitim save ya se ‘Jeova i glad’ long wanem we yumi mekem.—Ol Proveb 12:2.

¹¹ Taswe yumi no stap fosem yumi nomo blong obei. Yumi no jusum wetaem nao i stret blong yumi obei. Mo tu, yumi no gat tingting se bambae yumi obei sipos God i givim samting long yumi. * Tru ya, fasin obei i no wan fasin we yumi mekem sam samtaem nomo, taem evri samting i isi mo i no gat trabol, nogat. Defren olgeta, ‘long olgeta tingting [“hat,” NW] blong yumi, yumi stap obei.’ (Rom 6:17) Yumi gat sem tingting olsem man we i raetem Sam, se: “Taem mi stap obei long ol tok we yu yu putum, mi luk we oltaem mi mi stap harem gud from we mi laekem ol tok blong yu tumas.” (Ol Sam 119:47) Yes, yumi laekem tumas blong obei long Jeova. Yumi luksave se i stret nomo we Jeova i askem yumi blong obei long hem, mo i stret blong obei fulwan long hem, we yumi no gat tingting ya se hem i mas givim wan samting long yumi. (Dutronome 12:32) Yumi wantem tumas se Jeova i save tokbaot yumi olsem we hem i tokbaot Noa long Baebol. Olfala Noa we i holem strong bilif, hem i soem se hem i lavem God taem hem i obei oltaem nomo, nating se plante yia i pas. Baebol i talem se: “Noa i mekem olgeta samting ya olsem we God i talem.”—Jenesis 6:22.

12. ?From wanem Jeova i glad taem yumi obei?

¹² ?Jeova i harem olsem wanem taem yumi glad blong obei? Tok blong God i talem se samting ya i mekem Jeova i ‘glad we i glad.’ (Ol Proveb 27:11) ?Olsem wanem? ?I tru se taem yumi obei, yumi save mekem Haefala Masta blong heven mo wol i glad? Yes, yumi save mekem hem i glad. ?From wanem Jeova i glad? Jeova i wokem yumi we yumi fri blong jus. Hemia i min  se yumi nomo i mas jusum sipos yumi wantem obei long God, no sipos yumi no wantem obei. (Dutronome 30:15, 16, 19, 20) Taswe taem yumi jusum blong obei long Jeova wetem gladhat blong yumi, mo taem yumi mekem ol desisen we oli soemaot se yumi lavem God tumas, samting ya i mekem Papa blong yumi long heven i glad tumas. (Ol Proveb 11:20) Mo tu, taem yumi mekem olsem, yumi stap jusum beswan rod blong laef.

13, 14. ?From wanem Baebol i talem se ‘ol tok blong God i no strong tumas blong folem’? ?Mo wanem pijatok we yumi save talem blong soemaot samting ya?

¹³ Taem aposol Jon i tokbaot ol samting we Jeova i askem yumi blong mekem, hem i talem wan samting we i leftemap tingting blong yumi. Hem i se: “Ol tok blong hem i no strong tumas blong folem.” Long lanwis Grik, tok ya we long 1 Jon 5:3 oli tanem “strong tumas,” hem i wan tok blong talem samting we i “hevi.” * Wan narafala Baebol i tanem vas ya i se: “Ol loa blong hem oli no putum wan baden long yumi.” (NW) Jeova i no save askem yumi blong mekem samting we i had bitim mak mo i hevi tumas blong yumi mekem. Ol loa blong Jeova oli no strong tumas, ol sinman tu oli naf blong obei long olgeta.

¹⁴ Tingbaot pijatok ya. Wan gudfala fren blong yu i askem yu blong halpem hem blong wokem haos blong hem. I gat plante pos blong haos blong karem. Sam long olgeta i isi blong wan man nomo i karem, be sam narawan oli hevi mo i nidim we tu man i karem. Fren blong yu i jusum sam pos we hem i wantem yu blong karem. ?Olsem wanem? ?Yu ting se bambae hem i jusum sam pos we oli hevi tumas long yu? Nogat. Fren ya bambae i no wantem we yu gat kil from we yu karem wan pos we i hevi tumas. Long sem fasin, gudfala God blong yumi we i lavem yumi mo i kaen, hem i no save askem yumi blong folem  sam loa we oli strong tumas blong folem. (Dutronome 30:11-14) Neva hem i save askem yumi blong karem wan hevi baden olsem. Jeova i savegud wanem we yumi naf blong mekem, from we “hem i savegud we hem i mekem yumi long graon. Oltaem hem i stap tingbaot we yumi kamaot long asis nomo.”—Ol Sam 103:14.

15. ?From wanem yumi save bilif se ol loa blong Jeova oli save mekem i gud bigwan long yumi?

¹⁵ Ol loa, blong Jeova oli no wan baden. Oli save mekem i gud bigwan long yumi. (Aesea 48:17) From samting ya, Moses i talem long ol man Isrel bifo se: ‘[Jeova] i talem se yumi mas obei long olgeta loa blong hem, mo yumi mas tinghevi long hem, yumi mas onagud long hem. Mo sipos yumi stap mekem olsem, hem bambae i lukaot gud long yumi oltaem.’ (Dutronome 6:24) Yu tu yu save bilif se taem Jeova i givim ol loa long yumi, hem i mekem blong bambae ol loa ya oli givhan long yumi, oli lukaot gud long yumi blong olwe. Tru ya, Jeova i no save putum wan loa we bambae i spolem yumi. Hem i waes olgeta. (Rom 11:33) Taswe, hem i save wanem beswan rod blong yumi folem. Mo tu, Jeova i stamba blong lav. (1 Jon 4:8) Lav i olsem prapa fasin blong hem, i min se olgeta toktok mo fasin blong hem oli stanap long lav. Lav i olsem fandesen blong olgeta loa we hem i givim long ol man blong hem.

16. Nating se wol ya i traem pulum yumi mo sin we i stap long yumi i mekem yumi gat sam slak fasin, ?from wanem yumi naf yet blong obei long Jeova?

¹⁶ Hemia i no min se i isi nomo blong obei long God. Yumi mas faet agensem ol rabis fasin blong wol ya we i “stap long paoa blong Setan.” (1 Jon 5:19) Mo tu, yumi mas faet agensem ol slak fasin blong yumi we oli kamaot long sin mo oli stap pulum yumi blong brekem ol loa blong God. (Rom 7:21-25) Be sipos yumi lavem God, yumi save win. Jeova i blesem olgeta we oli obei long hem from we oli lavem hem. Hem i givim tabu spirit “long ol man we oli obei long hem.” (Ol Wok 5:32) Nao tabu spirit i wokem wan nambawan frut long laef blong yumi, hemia ol gudfala fasin we oli save halpem yumi blong obei oltaem long Jeova.—Galesia 5:22, 23.

17, 18. (a) ?Bambae yumi tokbaot wanem long buk ya, mo taem yumi mekem samting ya, yumi mas tingbaot wanem? (b) ?Bambae yumi tokbaot wanem long nekis japta?

 ¹⁷ Long buk ya, bambae yumi tokbaot ol stamba trutok blong Jeova mo ol gudfala fasin mo plante narafala samting we hem i wantem yumi blong mekem. Taem yumi mekem olsem, i gat plante impoten samting blong tingbaot. I gud yumi ting se Jeova i no fosem yumi blong obei long ol loa mo tingting blong hem. Hem i wantem we yumi glad nomo blong obei from we hat blong yumi i pusum yumi. Yumi no mas fogetem se ol samting we Jeova i askem yumi blong mekem long laef blong yumi, bambae oli mekem i gud long yumi naoia, mo bambae oli lidim yumi blong kasem laef we i no save finis long fiuja. Mo i gud yumi tingbaot se fasin blong yumi blong obei wetem fulhat blong yumi, i givim nambawan janis long yumi blong soemaot long Jeova se lav blong yumi long hem i bigwan olsem wanem.

¹⁸ Jeova i givim wan samting long yumi we i save halpem yumi blong luksave wanem i gud mo wanem i nogud. Hemia i olsem wan voes long hat blong yumi, wan tingting we i save jajem yumi. Be sipos yumi wantem we tingting ya i lidimgud yumi, yumi mas trenemgud. Nekis japta bambae i tokbaot samting ya.