Fasin fren i stanap long lav. Taem yu lanem moa samting long saed blong Jeova, bambae lav we yu gat long hem i kam bigwan moa. Mo taem lav we yu gat long God, i gru, bambae yu wantem moa blong mekem wok blong hem. Samting ya bambae i pusum yu blong kam wan disaepol blong Jisas Kraes. (Matiu 28:19) Sipos yu joenem hapi famle blong ol Witnes blong Jeova, bambae yu harem gud long fasin fren wetem God blong olwe. ?Yu mas mekem wanem blong kasem mak ya?

Yu mas soem se yu lavem God taem yu obei long ol loa blong hem. “Sipos yumi lavem God, hemia i min se yumi stap folem ol tok blong hem. Mo ol tok blong hem i no strong tumas blong folem.”—1 Jon 5:3.

Folem wanem we yu lanem. Jisas i talem wan stori we i soemaot samting ya. Wan waes man i wokem haos blong hem antap long wan bigfala ston. Wan man we i no gat hed i wokem haos blong hem antap long sanbij. Taem wan bigfala win i blu, haos ya we i stap antap long ston, i no foldaon, be haos ya we i stanap long sanbij i foldaon we i nogud olgeta. Jisas i talem se olgeta we oli harem ol tijing blong hem mo oli stap mekem ol samting we hem i talem, oli olsem waes man ya we i wokem haos blong hem antap long ston. Be olgeta we oli harem ol tijing blong hem mo oli no mekem ol samting we hem i talem, oli olsem man ya we i no gat hed, we i wokem haos blong hem long sanbij. ?Yu yu wantem stap olsem weswan man ya?—Matiu 7:24-27.

 Givim laef i go long God. Samting ya i minim se yu kam fored long Jeova tru long prea mo talem long hem se yu wantem mekem wok blong hem blong olwe. Taem yu mekem wok blong God, yu soemaot se yu wan disaepol blong Jisas Kraes.—Matiu 11:29.

Baptaes. “Yu tekem baptaes, mo yu singaot long nem blong hem, blong hem i wasemaot ol sin blong yu.”—Ol Wok 22:16, NW.

Joen fulwan long olgeta wok blong God. “Long wanem wok we yufala i mekem, be yufala i mas mekem long gladhat blong yufala, olsem we yufala i stap wok blong Masta blong yumi, yufala i no stap wok blong ol man nomo.”—Kolosi 3:23.