Beswan samting we i save hapen long yu hemia blong kam wan fren blong God. God bambae i tijim yu olsem wanem blong stap hapi mo sefgud; bambae hem i mekem yu yu fri long plante giaman bilif mo kastom we oli spolem man. Bambae hem i lesin long ol prea blong yu. Bambae hem i halpem yu blong kasem pis long tingting mo hem i mekem yu gat strong tingting. (Ol Sam 71:5; 73:28) Bambae God i lukaot gud long yu long taem blong trabol. (Ol Sam 18:18) Mo God i wantem givim presen blong laef we i no save finis long yu.—Rom 6:23.

Taem yu kam klosap moa long God, bambae yu kam klosap moa long ol narafala man we oli fren wetem God. Olgeta ya bambae oli kam fren blong yu tu. Yes, bambae oli olsem ol brata mo sista blong yu. Bambae oli glad blong tijim yu long saed blong God mo bambae oli halpem yu mo leftemap tingting blong yu.

Yumi no sem mak long God. Taem yu wantem kam wan fren blong God, yu mas kasem save long wan impoten samting. Fasin fren wetem God hem i no wan fasin fren bitwin tu man we tufala i sem mak. God i olfala moa mo i waes moa, mo hem i gat moa paoa, i bitim yumi. Hem i Man ya we i gat raet blong Rul antap long yumi. Taswe, sipos yumi wantem fren wetem hem, yumi mas lesin long hem mo mekem wanem we hem i talem long yumi blong mekem. Fasin ya i save mekem i gud long yumi oltaem.—Aesea 48:18.